Taamaattumik Qullissara Paamiuni takutinneqassanngilaq
Qullissanit eqqaamasarpassuit isiginnaagassiami ataatsimi takutinneq ajornaqaat. Taamaattumik eqqaamasakkat naatsunnguakkaarlugit ilitsersuisup isiginnaagassiamillu suliaqartup Makka Kleist suliarisimavai, illoqarfik aamarsiorfik pillugu eqqaaniut suliarigamiuk.
Isiginnagaassiaq Qullissani aasaq takuteqqaarneqarpoq illoqarfiup inuerunneranit ukiut 40-nngornerat nalliussineqarmat. Taamanikkut "Qullissara" Qullissat katersortarfiani Vajgatip qitigiaasa nipaannik ulikkaartarsimasumi takutinneqarpoq.
Nipilersukkat taakku nutarterneqarsimapput aammalu inuusuttunit erinarsorneqarlutik. Angalaarluni takutitseqattaarneq tallimanngormat Tasiilami aallartippoq.
- Inuit 450-it missaat isiginnaariarput. Issiaviit tamarmik inoqarput arlaqartullu nikorfaannarlutik isiginnaarput, Nunatta Isiginnaartitsivia nalunaarpoq.
Angalaarnerup aallartinnera KNR-mi saqqummiunneqarpoq illoqarfiit tikinneqartussat ilanngullugit taagorneqarlutik. Tassani Paamiut ilaanngilaq, tamannalu uparuarneqarpoq. Paamiormiummi paasiuminaatsippaat Qullissara illoqarfimminni takutinneqartussaanngimmat.
- Upernaaq "Qullissara" kommunenut tamanut neqeroorutigineqarpoq nuannaarutigaarpullu illoqarfiit taama amerlatigisigut soqutiginnillutik nalunaarmata. Kisianni tassa "Qullissara" Paamiut nalunaarnissamut piffissaliunneqartup iluani pisiarinngilaat, isiginnaartitsisartut nalunaarput erseqqissarlugulu Paamiut aamma assut tikikkusussimagaluaritik.
Tusarnaartitsiutigaluni isiginnaagassiap angalaarunnerani inuit aqqanillit angalaqataapput inuillu taama amerlatigisut angalanissaat piffissaq sivisooq atorlugu pilersaarusiorneqartarpoq. Illoqarfiit tikinneqartussat tassaapput: Aasiaat, Ilulissat, Qasigiannguit, Sisimiut, Maniitsoq, Narsaq, Qaqortoq og Nanortalik. Kulturikkullu illorsuarmi Katuami takutinneqassaaq arfininngorneq septemberip aallaqqaataani sapaammilu septemberip aappaani.
