Nalunaarusiaq: Taamaammat angallat takornariartaat Ilulissat eqqaanni kivivoq
Angallatip takornariartaatip Inuk II-p Ilulissat eqqaanni siorna aggustip 14-iani umiuneranik misissuinerup nalunaarusiarineqarnera imaani ajutoorsimasoqartillugu paasiniaasartut saqqummiuteqqammerpaat. Umiuneq ajorluinnartumik kinguneqarsimasinnaagaluartoq.
Allattoq Jonas Fievé
januaarip 04-at 2017 10:11
Angallatip iluarsartuunneqarnerata kingorna imaarsaatip ruujoritaata ikkuteqqinneqarsimannginnera umiunermut pissutaasoq misissuinerup nalunaarusiarineqarnerani inerniliunneqarpoq.
Aamma angallatip sukkasuupilussuarmik kiviartornera pissutigalugu ilaasut angallatip annanniutai atorlugit annanneqarsinnaasimanissaat qularnartoq nalunaarusiami naqissuserneqarpoq.
Taamaammat angallatit allat Inuk II-mut ornigutipallallutik takornarianik ilaasunik 23-nik annaassinerat iluatsitsinertut taaneqarsinnaavoq.
Nalunaarusiaq tamakkerlugu uani atuarneqarsinnaavoq.
