Sverige: Ulluni qulini toqutsinerit arfineq-marluk

Sverigemi piffissami kingullermi aallaaneqarlutik toqutaasut amerlavallaalermata naalakkersuisut immikkut ittumik ataatsimiigiaqqusipput.

SVT taama allappoq, tassa Sverigemi DR-p pissuseqataa.

SVT naapertorlugu, ullut qulit ingerlanerinnaani Stockholmimi aammalu illoqarfimmi Uppsalami inuit arfineq-marluk aallaaneqarlutik toqutaapput.

Sverigemi naalakkersuisut sapaatip akunnerata tulliani aallartittussamik qaaqqusinerat Aaqqissuussamik pinerluttuliortarneq akiorniarlugu siunnersuisoqatigiit allaffeqarfianni pissaaq.  

Inuit 63-t aallaaneqarlutik toqutaapput

Aaqqissuussamik pinerluttuliortarneq akiorniarlugu siunnersuisoqatigiit siorna decembarimi pilersinneqarput, taakkulu Sverigep inatsiseqarnermut ministerianit aqunneqarput.

- Pinerluttuliortarnerup akiorniarnera sukatertariaqarparput tamanna pillugu suliniaqatigiiffinnik ilalerluta, Sverigep inatsiseqarnermut ministeria Gunnar Strömmer partiimit Moderaternameersoq SVT-mut taama oqarpoq.

Siunnersuisoqatigiit ilaatigut eqqartussavaat, inupiloqatigiit meeqqanik inuusuttunillu ilaasortassarsisarnerisa qanoq iliorluni akiorniarneqarnissaa, SVT allappoq.

Siunnersuisoqatigiinni aalaakkaasumik ilaasortaanut soorlu ilaavoq Sverigemi politiit qullersaat, taamatuttaaq allat ataatsimiigiaqqusaapput soorlu Ilinniartitaaneq pillugu aallartitat aammalu Inunnik isumaginnittoqarfimmut tunngasumi aqutsisoqarfimmeersut.

Ukioq kingulleq Sverige alianartumik rekordtiliivoq, tassa 2022-p ingerlanerani inuit 63-t aallaaneqarlutik toqutaammata, ukiullu siuliani 45-llutik.