Svenskit nunatsinnik niueqateqarnissaat aqqutissiuunniarpa
Nunatsinnut niueqateqarnissaq aqqutissiuunniarlugu Danmarkimi svenskit aallartitaata ivertinneqaqqammersoq, Inga Eriksson Foghi nunatsinnut tikeraartussat ilagaat.
- Naalagaaffimmit aallartitatut periarfissanik aqqutissiuussisinnaavunga, aamma avammut niueqatigiinneq pillugu ataatsimiittartoqatigiit peqatigalugit angalanissamut pilersaarut massakkut aaqqissuupparput, peqataanissarlumi aamma soqutigineqaqaaq Inga Eriksson Fogh oqarpoq.
Angalaqatigiit nuiermut ministeri, Ewa Björling, siuttoralugu Kalaallit Nunaannut aggustip naalernerani tikissapput.
- Suliniuteqarneq nammineerluta aallartikkatsigu neriuutigaarput suleqatigiinnermik annertunerusumik kinguneqarumaartoq, Inga Eriksson Fogh oqarpoq.
Taassuma oqarnera naapertorlugu Kalaallit Nunaata pisuussutai toqqortat koruuninik milliarderpassuarnik nalillit, svenskit inuussutissarsiortuisa immikkut ittumik soqutigilluinnaraat.
Sverige aatsitassarsiornerup iluani nunarsuarmi siuttunut ilaavoq.
Svenskit inuussutissarsiortui nunatta pisuussutaannik aningaasanik isaatitsiniarsarilissappata, taava akerlianik uagut qanoq ililluta - suliffeqarfinnut akitsuutit akileraarutillu isertitassat saniatigut - Svenskit aningaasaqarneranit siuariartortorujussuarmit qanoq pissarsisinnaavugut?
Aap, aalisakkanik raajanillu Kalaallit Nunaanneersunik svenskit pisiortornerisa pioreersup saniatigut, misigisassarsiorlutik takornariartartut, svenskit koruuniinik amerlanerusunik isaatitsiffigilersinnaagigut, naalagaaffimmi aallartitap nalilerpaa.
- Pinngortitamik nuannarinnittut sissamiinnermiit seqinnisaarnermiillu arlaatigut sammisaqarnissaq soqutigineruvaat. Kalaallit Nunaanni qajartorusupput imaluunnit allatut ittumik misigisaqarusupput. Tamatuma maani ineriartortinneqarnissaa eqqumaffigineqarmat paasisinnaavara aammalumi qularutiginngilara svenskerpassuit pinngortitamik nuannarisaqartut tamanna soqutigilluinnassagaat, Inga Eriksson Fogh oqarpoq.
Taanna ippassaanili nunatsinniippoq, ullumi ataasinngornermi Nuummiit Ilulissat aqqusaariarlugit Københavnimut timmisartussaaq. Inuussutissarsiornermut, Aningaasaqarnermut kiisalu Nunat avannarliit pillugit Suleqatigiinnermut Naalakkersuisunik, aammali suliffeqarfiit soorlu Air Greenland, Royal Greenland, Kallaallit Nunaanni Sulisitsisut kiisalu Pinngortitaleriffimmik Inga Eriksson Fogh ataatsimeeqarpoq.
