Svenskit kalaallinut 42-24-imik ajugaapput
Angutit inuusuttut U-21-t nunatsinneersut nunarsuarmi pissartat Sverigemeersut ullumi unammigamikkit ajorsaqqipput. Kalaallit akiuulluaqisut 24-42-mik ajorsarput, nikinnermi 6-21-qqasimallutik.
Allattoq Najaaraq Egede
Sungiusaasoq Jacob Andreassen Radioavisimut oqarpoq. Kalaallit arsartartui tunniusimavallaaratik arsarsimasut. Svenskilli pisarnermissut sakkortuumik, kalaallit qasutillugit, arsariaaseqarsimasut.
-Nikallunngilagullit. Holdit sukalanerpaat marluk naapereerlugit ilikkagaqaqaagut. Taamaammat aamma ajoqusertoqarata assammik arsarnerput qujanarpoq. Hollandimut aqaguagu unamminissatsinnut piareersimassaqqaarpugut, Jacob Andreassen oqarpoq.
Assammik arsarlutik pissartanngorniuttut aqagu sapaammi qasuersaassapput.
Kalaallit Nunaata Sverigemut unamminera Port Saidimi illorsuarmi timersortarfimmi 400-nit isiginnaarneqarpoq.