Svalbardip eqqaani uuliakoortoqannginnissaa ilungersuutigineqartoq
Tusagassiorfik High North News taama allaaserisaqarpoq.
Kilisaat "Northguider" Svalbardip eqqaani decembarip 28-ani ikkarlippoq uuliamillu 320.000 literinik orsussamaateqarluni. Uuliakoortoqarnissaalu pinngitsoortinniarlugu, kilisaallu oqilisarniarlugu orsussamik imaajarneqassaaq.
AAMMA ATUARUK Hurtigruten aalisakkanik toqunernik ingerlateqalerniartoq
Angallatit pingasut tamatumunnga atorneqassapput, taakkulu tamarmik immikkut uuliamik 2000 literimik assartuisinnaapput. Orsussarlu kilisaammiittoq tamakkerneqassappat angallatit 160-eriarlutik assartuisariaqassapput.
Norgemiut umiarsuaatileqatigiiffiat Opelio AS kilisaammik piginnittuuvoq, taassumalu annaassiniarnermut aningaasartuutit akilertussaavai. Umiarsuaatileqatigiiffimmi ulluinnarni aqutsisoq, Arne Birkeland, isumaqarpoq angallateeqqat atorlugit assartuinissamik aaqqiissutigineqartoq pisariaqartoq.
- Orsussaasiviit sukkanerpaamik imaarnissaannut aaqqiissutissatut pitsaanerpaatut isikkoqarpoq, High North Newsimut taama oqarpoq.
AAMMA ATUARUK Ilisimatusarnerup Issittumi sooq mingutsitsisoqarnerunera erseqqissaraa
Norgep sineriaani nakkutilliisut naapertorlugit kilisaatip kisiverartarsinnaanera ilimagineqanngilaq. Uuliakoortoqarnissaali pinngitsoortinniarlugu annaassiniarneq sumiiffimmi taartupilussuarmi, 15-20 gradinik issitsigisumi sikoqartupilussuarmilu ingerlanneqarpoq.