Sunoorsit 150 koruuneqalissapput
Siunnersuut nunatta karsianut 96 millioni koruuninik isertitsissutaasinnaasoq.
Benzina akia liiterimut 45 ørimik qaffanneqassaaq. Angalanissallu kisimi akisunerulissanngilaq. Kiassarnermut akiuliutit aamma qaffaaffigineqassapput tassami gassimut, dieselimullu liiterimut akit 45 ørimik qaffassammata.
Aamma neqit nunanit allaneersut akisunerulissapput. Kukkukuunut neqinullu allanut akit marloriaatinngussapput tassa kilomut 10 koruunimik akiliinerusalissaatit, Brugsenip allaffeqarfia taama paasititsiivoq.
Aamma atuaruk Sukkulaatinut, neqinut tupanullu akitsuut qaffanneqalerput
Savat savaaqqallu akitigut qaffaavigineqassanngillat. Taamaasillutik neqinik nunatsinneersunik pisisartut atuinerulissasut Naalakkersuisut isumaqarput. Tamannali Brugsenimit qularineqarpoq tassami ullormit ullormut pisisartut pisiarisartakkatik allanngortissinnaagaat ilimaginnginnamikku.
Mamakujuttunik mamarisaqaruit aamma politikkerit aalajangiinerannit sunnerteriaannaavutit. Sukkulaatinut akigititat aamma qaffassapput soorlu Marabou sukkulaat 6 koruuninik akisunerulissammata.
Aamma atuaruk SIK-p siulittaasua: - Akitsuutinik qaffaaneq sulisartunut eqquinerlussaaq
Aamma tupatortartut nunatta karsianut matussusiiniarnermut akileeqataassapput. Massakkullu sukuluunik sunoorsinillu atuisut akiliinerusalissapput.
Sunoorsit "Oliver Twist"-inik atillit massakkut Brugsenimi 40 koruuninik akeqarput. Inatsisartulli ukiaru ataatsimiinnerani siunnersuut akuerineqassappat sunoorsit akii 150 koruuninut qaffassasut, Brugsenip allaffeqarfianit oqaatigaat.
