Sunngiffimmi piniartumut inuussutissarsiutigalugulu piniartumut tuttut marluk
Tuttut qassit pisarineqartarsimanerinik kisitsit kingulliit, Aalisarnermut, Piniarnermut Nunalerinermullu Naalakkersuisoqarfimmit pigineqartut, takutippaat 12.368-it sunngiffimmi piniartunit inuussutissarsiutigalugulu piniartunit 2010-mi pisarineqarsimasut.
Agguatigiisitsinikkut ataaseq 1,7-mik pisaqarsimalluni. Inuussutissarsiutigalugu piniartoq agguatigiitsinikkut arfinilinnik pisaqarsimassalluni, tamatumani sunngiffimmi piniartoq ilaanngunneqarani. Sunngiffimmi piniartut 5.548.-pput, inuussutissarsiutigalugu piniartut 2.083-ullutik.
Aavarneq aggustip aallaqqaataani aallartippat inuussutissarsiutigalugu piniartut sunngiffimmilu piniartut killilersugaanngitsumik aqutsiveqarfinni ukunani tuttussinnaapput: Naternaq, Akia-Maniitsoq aamma Ameralik. Sisimiut-Kangerlussuaq. Qeqertarsuatsiaat aamma Neria. Ivittuut, Pituffik.
Aqutsiveqarfinnilu ukunani aalangersimasunik tuttutassaqarpoq: Qaanaaq 172-nik. Upernavimmi, Uummannami, Ilulissani, Qeqertarsuarmi Qasigiannguanilu piniartut katillugit 474-nik Nuussuarmi tuttutassaqarlutik.
Aqutsiveqarfimmi Qaanaami Inglefield Landimi aavarneq aggustip aallaqqaataani aallartissaaq apriilip 30-ani aatsaat taamaatissalluni.
Aavarfinni killilersugaanngitsumik pisaqarfiusinnaasuni aavarneq aggutsip aallaqqaatani aallartissaaq oktobarip 15-ani taamaatissalluni. Pituffimmili najugaqartut aallaaniarsinnaanermut uppernarsaatillit Olrik Fjordimi aggutsip aallaqqaataanit aavarsinnaalissapput apriilip 30-ani aatsaat tuttut piniagajunnaassallutik.
