Sunngiffimmi aalisartunut saarulliit 1000 tonsit qalerallillu 100 tonsit
Nunatsinni sunngiffimmi aalisartut tunisinissamut periarfissinneqassasut, Naalakkersuisut aalajangiuppaat.
Sunngiffimmi aalisarnermi "siulliniuulluni" ataatsimut pisassiisoqartassaaq, nungunnissaasalu tungaannut aalisartoqartassalluni. Saarulliit katillugit 1000 tonsit 2016-imi pisassiissutigineqarput.
Taassumalu saniatigut sunngiffimmi aalisartut aqutsiveqarfiini Upernavimmi, Uummannami Qeqertarsuullu Tunuani qaleralinnik 100 tonsinik katillugit 300 tonsit, qullukkiornerunissamut atugassanik tunisisinnaassasut, Naalakkersuisut aalajangerpaat.
Sunngiffimmili aalisartut tunisisinnaanissaamut akuersissummik Aalisarnermut, Piniarnermut Nunalerinermullu Naalakkersuisoqarfimmut qinnuteqaqqaassapput.
Tassa qinnuteqartoq ukiut marluk kingulliit nunatsinni inuit allattorsimaffianni nalunaarsimassaaq, soorlu aamma maani nunatsinni akileraartartuussaatitaalluni. Qinnuteqartorlu inuussutissarsiutigalugu aalisartooriissanngitsut, Aalisarnermut Naalakkersuisoqarfimmiit tusagassiutinut nalunaarutiminni erseqqissaatigaat.
Sunngiffimmi aalisartut Aalisakkat tulaassaat, inuussutissarsiutigalugu aalisartut tulaassaannut piumasaqaatigineqartut tunngavigalugit suliarineqarsimanngippata tunitsiviup itigartitsissutigisinnaavai.
Aalisakkat pisassiissutigineqartut tamakkerlugit aalisarneqarsimasutut nalunaarutigineqarpata, tunisineq unitsinneqassaaq. Sunngiffimmilu aalisartup akisussaaffigigaa nammineerluni isertitani Akileraartarnermut Aqutsisoqarfimmut nalunaarutigissallugit,, Naalakkersuisoqarfik nalunaarpoq.
Sunngiffimmi qerititsivimminnik immiiginnarusullutik aalisarusuttut aalisaannarsinnaasut, Naalakkersuisoqarfimmi allaffimmi pisortap, Jóhanna Lava Køtlumip KNR-imut nalunaarutigaa.
