Sungiusaasoq: Angutit inuusuttut arsalerillaqqipput

Angutit inuusuttut U-18-it nunanut allanut unammisartuisa sungiusaasuat ima oqarpoq:

- Arsalerillaqqipput arsaalluartarlutillu , René Olsen oqarpoq nangillunilu:

- Kakkanaaqaakka. arsalerillaqqippummi, sulilu inuusuttuunerat eqqarsaatigalugu siunissamut isumalluarnarpoq. Arsaattartummi inuusuttut ilaasa angutit inersimasut nunanut allanut unammisartuinut sanilliunneqarsinnaapput, René Olsen, angutit inuusuttut U-18-it nunanut allanut unammisartut sungiusaasuat oqarpoq.

Taanna angutit inersimasut nunanut allanut unammisartut sungiusaasuannut aamma ikiortaavoq.

Angutit inuusuttut Nuummi ingerlanneqartumik Nunatsinni pissartanngorteqqammerput. B-67 Nuummeersoq tassani pissartanngorpoq, N-48, Ilulissat, pissartanngorniutivinnermi 4-0-imik ajugaaffigigamikku.

Arsaattartullu taakku akornanni arsaattartoqarpoq inersimasut nunanut allanut unammisartuinut ilaalluarsinnaasunik, René Olsen oqarpoq:

- Pikkorissiartuinnarnerat malunnarpoq. Arsalerillaqqeqaat, ukiullu tamaasa pikkorissiartuinnartut maluginiagassaavoq, René Olsen naqissusiivoq.

Inuusuttuunerminngaanniit inersimasuunermut ikaarsaarneq ilaatigut ajornakusoorsinnaasartoq, taassuma aamma oqaatigaa:

- Ajornakusoorsinnaasarpoq. Inuusuttummi suli ineriartorput, inersimasullu nunanut allanut unammisartuinut ilaaniaraanni inerilluarsimanissaq pisariaqarpoq, angutit inuusuttut U-18-it sungiusaasuat René Olsen naggasiivoq.