Suna pingaarnerunersoq apeqqutaatinneqarpoq
Naalakkersuisut siulittaasuata innuttaasunik paasissutisseeriaasia paasiuminaatsupilussuuvoq. Nersornaaserneqarnera Uummannamullu tikeraarnera pillugu Namminersorlutik Oqartussat tusagassiortuisa nalunaarutaat arfineq marluupput, politikkikkulli sammineqartut pillugit ataasinnguamilluunniit oqaaseqartitsinissamut periarfissaqarani.
Facebookimi ullaap tungaani allatai kingulliit eqqaassutissamut, ippernamit kapitissimanermut allanullu tunngassuteqarput, tusagassiortulli nunatta siuttuata attaveqarfiginissaanut periarfissaqanngilluinnarput. Hammondimuna suna taama pingaaruteqartigisoq suliarigamiuk, kanngunartuliornerit marluusut, nunatsinnilu tusagassiorfinnit sammineqartupilussuit pillugit isummaminik innuttaasunut tusarliussaqarusunngittoq?
Hammond AG-mi saqqummersumi kingullermi oqaraluarpoq oqarasuaatini nassarnagu angerlarsimaffinni qimanngisaannarlugu, aamma kangerlummut angalatilluni qaammataasakkoortumik oqarasuaatini nassartuaannarnerarpaa. Attavigineqarsinnaajuaannarsinnaanera ataqqinartuuvoq, tamannali nersornaasiisoqarneranut imaluunniit sanigorsarnermut ilaqutariinnullu tunngasunut taamaallaat atuunnera pissusissamisoorsorinanngilaq.