Sumiissusersiut ajoquteqarmat qulimiguulik tammartajaartoq

- Nanortallip eqqaani sumiiffinnik ilisimaarinninnginneq sumiissusersiutillu ajoquteqarnera pissutigalugit helikopterimi aquttumut paatsiveerutitsisimasut, Air Greenlandimit oqaatigineqarpoq.

Pisimasumut aallarniutaasutut, Air Greenlandip nassuiaatigaa kujataani nunaqarfinnut qulimiguulik Bell 212 Telemit attartorneqartilluni, ulloq tammartajaarfiusoq ataatsimik sioqqullugu, Tele stationemiitilluni annikitsumik ajoqusermat ingerlaqqisinnaajunnaarluni.

Qulimiguulik alla AS350 Nuummiit kujammukartinneqarpoq Telermiut angallakkiartorlugit. Qulimiguulillu kujataani siornatigut atorneqarsimanngilaq aquttualu kujataani timmisartuussinermik misilittagaqanngitsoq ilaasunik assartuisussanngortinneqarpoq.

Taamaammat qulimiguullip kujataani aqqutissatut ilitsersuutaat sumiissusersiutaani ikkusimanngillat.

Tamannali akornutissaqanngikkaluarpoq, sumiissusersiut akuarisaasoq atorlugu timmisartuussineq ingerlanneqassammat, kisiannili paasinarsivoq Aappilattup inissisimanera illusinaarlugu sumiissusersiummut ikkunneqarsimavoq, tamannalu aquttumut paatsiveerussutaalersimavoq.

Aquttorlu meqqaarluni nunap assinganik misissuisariaqalerneranik kinguneqarluni.

Pisimasumi navianartorsiortoqarsimanngitsoq ullullu sinnera timmisartuussinerit pissusissamisoortumik ingerlanneqartut, Air Greenlandip erseqqissaatigaa.