Sumiiffinni marlunni amaqqut killeqanngitsumik toqunneqarsinnaalersut
Qaanaami Ittoqqortoormiinilu amaqqut killeqanngitsumik pisarineqarsinnaalertut, Naalakkersuisut tusagassiortunut allapput.
- Tamanna imatut paasissaavoq, inuussutissarsiutigalugu piniartut atuuttumik piniarnermut allagartallit tuttunniartillutik, umimmanniartillutik piniakkanillu allanik neqissaqarniarnermut pingaarutilinnik piniariartillutik amaqqunik naammattuuigunik pisarisinnaagaat, Naalakkersuisut allapput.
Amaqqunik pisaqarnermi immersugassaq atorlugu pisamik nalunaaruteqarnissaq kommunimut tunniussinikkut inatsimmi piumasaqaataavoq soorluttaaq amaqqup ilaanik uumassusilerinermik misissuinermut atugassanik tunniussisoqassasoq.
Naalakkersuisut amaqqut sumiiffinni taakkunani ukioq kaajallallugu septembari qaammat piniarneqarsinnaalersikkamikkit pisassat qanoq amerlatigissanersut kingusinnerusukkut nalunaarutigissallugit allapput, maannali pisassiinatik killeqanngitsumik piniartitsilerput.
Pinngortitaleriffiup amaqqut pillugit siunnersuinerani kingullermi 2019-imeersumi ima allassimasoqarpoq:
- Amaqqut amerlassusaat sukumiinerusumik ilisimaneqalerpata, nungusaataanngitsumillu piniarneqarsinnaalernissaat uppernarsarneqarpat aatsaat pisarineqartalernissaat, Pinngortitaleriffiup innersuussutigerusuppaa.