Sume pillugit filmiliaq Canadami radiokkut aallakaatitassiami nuannarineqarluartumi sammineqartoq
Canadami nipilersornermik kulturimillu aallakaatitassiat ilisarisimaneqarnerpaat naalaarneqarnerpaallu ilagaat “Q-- with Jian Ghomeshi”. (Q-- Jian Ghomeshi peqatigalugu”)
Aallakaatitassiamilu tassani, Canadap radioani program 1-imi ullaat tamaasa aallakaatinneqartartumi, apersorneqartartut tassaasarput "tusaamasat" imaluunniit kulturikkut suliniuteqarlutik immikkut maluginiarneqarsimasut.
Aallakaatitassiamilu ippassaq ullaap tungaani sammineqartoq tassaavoq 'Sume - Mumisitsinerup Nipaa'.
Nunat inuiisa filminik festivalertitsineranni, ImagineNative filmfestivalimi, Nipilersoqatigiit Sume pillugit filmiliaq marlunnik nersornaaserneqaqqammerpoq.
AAMMA ATUARUK Sume - Mumisitsinerup Nipaa marlunnik akissarsitinneqarpoq
Filminik festivalertitsinerit Torontomi ukioq allortarlugu pisarpoq, Canadamilu naggueqatigiit indianerit, métisit inuillu filmiliaat kisiisa samminagit aamma nunani allarpassuarni nunap inuiisa filmiliaat sammineqartarlutik. Canadami filmiliornikkut ukiumut aaqqissuunneqartartut pingaarnersaattut isigineqarpoq, ussaffiulluarneqartarluni aammalu tusagassiuutitigut sammineqartupilussuusarluni.
Filmilu marlunnik nersornaasigaammat, Inuk Silis Høeghip “Q-- with Jian Ghomeshi”-mi apersorneqarnissaa tulluartinneqarsimavoq.
Inuk Silis Høeghip apersorneqarnermini nipilersoqatigiit Sume Nunatsinni ukiuni kingullerni 40-ni qanoq sunniuteqartigisimanerat oqaluttuaraa, aammalu Sume nalitsinni inuit eqqarsartaasiaanut suli pingaaruteqartupilussuusoq oqaatigalugu. Aamma kalaallit qanga rockimik nipilersortut kalaallisut erinarsortut qanoq tupaallaatigisarsimatigineraat oqaluttuaraa.
Radiokkut aallakaatitassiami aqutsisup nammineerluni filmi oqaluttuassartaalu assut alutorsaatigaa, Inuk Silis Høeghillu filmimik taama kusanartigisumik suliaqarsimaneranut pilluaqqullugu.
Inuk Silis Høeghip radiokkut apersorneqarnera uani tusarnaarsinnaavat.
AAMMA ATUARUK Nipilersoqatigiit Sume pillugit piviusulersaarut nersornaasigassatut innersuunneqartoq
AAMMA ATUARUK Nipilersoqatigiit Sume pillugit piviusulersaarut danskit alutorsaatigigaat
AAMMA ATUARUK Nipilersoqatigiit Sume pillugit piviusulersaarut angallatileraat
AAMMA ATUARUK Mumisitsisoqarneranik oqaluttuaq