Mumisitsisoqarneranik oqaluttuaq

Kalaallit Nunaanni rockimik nipilersoqatigiit tusaamasaanersaat pillugit piviusulersaarut, Mumisitsinerup nipaa, septembarimi saqqummertussaavoq.

Nipilersoqatigiit Sume pillugit filmiliaq naammaassineqartoq

- Nipilersoqatigiit pillugit filmiliap taamatut taaguuserneqarnera taaguusiipallannertut isigineqarsinnaavoq, Sumekkulli mumisitseqataapput, ilitsersuisut marluusut aappaa, Emile Hertling Peronard, oqarpoq.

- Naqisimaneqarnermut isornartorsiuineq kikkunnut tamanut misigineqarsinnaanngorlugu oqaasertalersorpaat. Uumissuerpalaaratillu annertunerusumik qallunaanut akerliunianngillat, kalaallitulli kinaassuseqarnitta nassaareqqinnissaanut taalliaat suaarutaapput, taamanikkullu tamanna amerlaqisunut naleqqulluni, taanna oqarpoq.

Malik Høeghip aappaa unnuit ilaanni oqaloqatigitillugu filmiliornissaq taassuma isumassarsiaraa. Ingerlaannarlu isumassarsiani Inuk Silis Høeghimut saqqummiukkamiuk taassuma ingerlaannaq aamma akueraa.

Emile Hertling Peronardip Inuk Silis Høgh peqatigalugu nipilersoqataasut apersortarlugillu KNR-ip toqqortaasiviani ujarlerput inuillu angerlarsimaffiini naqqup ataaniittut filmit immiussallu qanganitsersimasut pissarsiaralugit. Taakkua filmiliaq Sumekkunnuinnaq kalaallillu rockimik nipilersortarnerannut tunngasoq ukiuni marlunni suliaraat. 

Taamatut suliaq aliatsannarpalaartumik inuiaassutsimullu atatillugu kusassaarpalaarnertut isikkoqaqqajaannginnersoq apeqqutigaarput.

- Soorunami Sume pillugu oqaluttuaq inuiaassutsimik kusassaarpalaartupilussuuvoq, tamannalu uanga pikkugiinnarpara, nunamimmi nutaamik pilersitsiniarnitta nalerimmagu, taamaammat soorunami qanga pissutsit ileqqutoqqallu iluarusuutigisinnaasariaqarpagut inuiaassuserpullu kusanarsalaarsinnaasariaqarlutigu.

Filmiliortartup Københavnimi qiortaallunilu paasissutissanik ujarlernermini misigisimavaa maannakkut Kalaallit Nunaata oqaluttuarisaanera arlalitsigut ´70-ikkut qiteqqunnerattut ilisoq. Ukioq 2014 1970-ikkut qiteqqunnerannit arlalitsigut allaanerugaanngilaq, taanna oqarpoq:

- Taamani Kalaallit Nunaanni aatsitassat qallorneqarnissaat pillugu aamma oqallittoqarpoq, Kuannersuarnilu uranimik piiaanissaq aamma eqqartorneqarluni. Qallunaat Kalaallit Nunaanni uuliasiorniarnerat isornartorsiorlugu kalaallit akerliussutsimik takutitsisarput. Ullumikkut tamakkua aamma oqallisaapput, maannakkulli uagut nammineq aalajangiisussaatitaalluta, taanna oqarpoq.

Filmiliornera taassumunnga aamma inuttut annertuumik sunniuteqarpoq.

- Ukiorpassuarni Kalaallit Nunaanniinngilanga, timikkuinnaanngitsoq aammali anersaakkut. Arlalitsigut misigivunga Kalaallit Nunaat qimavissoqqallugu, ilunnili tamanna ippinnartoqartillugu. 

Kalaallit Nunaanneersumilli aappaqalernini Sumekkullu nipilersugaasigut illorraallassimavoq. 

- Maqaasisakka Kalaallit Nunaannut tunngasut pikkunavissortumik misigaakka, taanna oqarpoq.

Filmi Nuummi septembarip 12-iani, Sisimiuni 18-iani kiisalu Ilulissani 21-ani takuteqqaarneqaassaaq. Filmiliortulli aappaa tusarnaartartunut kaammattuuteqarpoq.

Ilitsersuisut sinerissami filmi takuteqattaarlugu angalanissaminnut suli aningaasanik katersipput.