Sume-kkut Qullissani tusarnaartitsissapput
Ukiut anguneqartut malunnartinniarlugit Ilulissani Qullissat ikinngutai assigiinngitsunik aasaru pisussanut piareersaatinik maannakkut inaarsaaleruttorpoq. Pisussaq maannakkut aalajangiunneqareersimasoq tassaavoq nunatsinni rockimik nipilersornermik tusaamasat Sumekkut juulip 7-ani tusarnaartitsinissaat.
Aamma pisussat takorannersut ilaat tassaavoq Nunatta Isiginnartitsiviata, illoqarfiup ukiut 40-it matuma siorna inuerunneranut malunnartitsilluni musikalimik immikkut isiginnaagassiaata ”Qullissara”-mik taaguuteqartup - isiginnaartunut takuteqqaarneqarnissaa.
Qullissat inoqarallarmat, taakku inooriaasiinik isiginnaartitsissusiaalluni. Isiginnaagassiami ilitsersuisuuvoq qullissarmiu Makka Kleist.
Ilulissani Qullissat ikinngutaasa siulittaasuat Thorkild Jeremiassen oqaluttuarpoq Qullissat inuerunnerisa ukiunik 40-nngortorsiorneranut atatillugu Sumekkut tusarnaartitsisinnaanissaannut iluatitsisimallutik. Thorkild Jeremiassenip oqarnera naapertorlugu Sumekkut avannaani aasaru tusarnaartitsiartortussaapput.
Qullissat qullissarmiuusimasunit aasat tamaasa aasarsioriartortunik inoqartarpoq. Peqatigiiffiup siulittaasua oqaluttuarpoq maajimit septembarimut 200-it missaanni inoqartartoq. Thorkild Jeremiassenip naatsorsuutigaa ukiunik immikkut malunnartitsinerummat inunnik ikinnerpaamik 400-nik Qullissat tikinneqassasoq.