Sulorarnermi nunanut allanut unammisartut arlallit toqqarneqarput
![Badminton AWG 2023](/sites/default/files/styles/image_934x467/public/2023-04/badminton.jpeg?itok=dCAf4JuL)
Sulorarnermi unammersuarnerit Europami issittumilu pisussat ukiup affaa tulliuttoq Nunatsinniit peqataaffigineqartassapput.
Sapaatip akunnerata naanera tulliuttoq unammersuarneq Small Nations Maltami pisussaq Nunatsinniit peqataafigineqassaaq tassanilu kalaallit puljeqatigissavaat Island, Cypern aamma tuluit qeqertaat Isle of Man.
- Nunat taakku naligipajaarpagut neriuppungalu taakkununnga naligiiffiusumik unammisinnaajumaarluta, nuna tamakkerlugu sungiusaasoq Rune Svenningsen KNR-mut oqarpoq.
Qaammallu ataaseq missaliorlugu qaangiutiinnartoq arnat angutillu nunanut allanut unammisartut EM-mut anngunniuttuni unammeqataassapput angutit Tuluit Nunaanni arnallu Bulgariami unammissallutik.
Angutit unammissavaat Israel aamma Beligen arnat Ukrainemut Tyrkiamullu unammisussaasut.
Ilimanarpoq ajugaaffigiuminaattorujussuarnut kalaallit unammissasut. Taamaattumik Small Nationsimi peqataaneq isumalerujussuanngorpoq.
- Qularutissaanngilaq allamukarluta amerlanerusunik unammisarutta tamaviaartitaallutalu assigiinngitsunik atugassaqarfiusuni unammineq sungiukkiartussagipput, Rune Svenningsen oqarpoq.
Arctic Winter Games
Aappaagu Arctic Winter Gameseqarnissaani peqataasussat aamma toqqarneqarput tassani inuusuttuaqqat unammissallutik. Inersimasut inuusuttuaqqallu nunanut allanut unammisartuinik toqqaanissaq sioqqullugu oktoberip qiteqqunnerani Nuummi sungiusaqatigiittoqarpoq, tassanilu inuusuttuaqqat aamma peqataapput.
- Isumalluarpunga. Isumaqarpunga inuusuttuaqqat pikkorissut toqqagaanissamut piukkunnaatillit saqqummillattaalersut. Ajusaarnarporluunniit tamaasa toqqarsinnaannginnakkit kisianni timersorneq tassa taamaappoq, Rune Svenningsen oqarpoq.
EM-mut angunniunnerit decemberimi pissapput inuusuttuaqqallu Arctic Winter Gamesimi unamminerat martsimi pissalluni.