Sullissisussanngorlugit pineqaatissinneqartartut amerliartorput
Taama aaqqissuussineq mianersortunnguamik aallateriarluni nunatsinnut tamanut siaruaakkiartortoq, Danmarkimi pinerluttunik isumaginnittoqarfiup nittartagaa, kriminalforsorgen.dk allappoq. 2015-imi qaammatini qulini siullerni 29-it inuiaqatigiinni sullissisussatut pineqaatissinneqarsimapput.
Inuiaqatigiinni sullissisussatut pineqaatissinneqarneq pineqaatissinneqarsimasunut inissiisarfimmiittussatut eqqartuussaanissamut 2010-mi taartaasinnaalerpoq. Periarfissaarli taanna 2014-imi aatsaat iluamik atorneqalerpoq.
Nunatsinni pineqaatissinneqarsimasut amerlapput
- Nunatsinni pineqaatissinneqarsimasut taama amerlatigitillugit allaanerusumik, suliffimmik annaasaqarfiunngitsumik ilaquttanillu isumaginnissinnaajunnaarfiunngitsumik, pineqaatissinneqarsinnaaneq pingaarpoq, nunatsinni pinerluttunut isumaginnittoqarfiup 2013-imiit pisortaa Hans Jørgen Engbo, oqarpoq.
Kalaallit pinerluuteqarsimasunut inissiissarfinnut pineqaatissinneqarsimasut, inuttussutsit eqqarsaatigigaanni Danmarkimi parnaarussivinnut pineqaatissinneqarsimasut sisamariaataannik amerlassuseqarput, kriminalforsorgen.dk naapertorlugu Nunatsinni pinerlunnerit amerlanerullutillu peqqarniiserfiunerummata.
Sullissisussanngorlugit pineqaatissiisarneq sungiukkiartorpaat
Nunatsinni eqqartuussiviit inuiaqatigiinni sullissisussanngorlugit pineqaatissiineq sungiukkiartoraat, pinerluttunik isumaginnittut ammasumiittut pisortaat, inuiaqatigiinni sullissisussatut pineqaatissiisarnermik aamma aqutsisuusoq, Aviaja Olsvig naliliivoq.
Taassuma inuiaqatigiinni sullissisussanngorlugit pineqaatissiisarneq inuiaqatigiinnut pitsaasuusoq qularutiginngilaa.
- Nunatsinni ikittunnguuvugut. Amerlanerpaat pilersueqataallutik ulluinnaqarnissaat pisariaqartipparput, inuiaqatigiinnilu sullissisussaalluni pineqaatissinneqarneq tamatuminnga qulakkeerinneqataavoq, pineqaatissinneqartup ulluinnarni suliani ingerlatiinnarsinnaammagit. Aamma nakkutiginnikkatta attaveqarfigiuarpatigut, taamaalillutalu inuunerminni ajunngitsumik ingerlariaqqinnissaannut ikorfartorsinnaallutigit, Aviaja Olsvig pinerluttunik isumaginnittoqarfiup nittartagaanut oqarpoq.
