Sullissinertik pitsanngorsarniarpaat

- Kalaallip arnap eqqartuussisunut suliakkiissutaa pillugu sulinerput pitsaasimanngilaq. Paatsoorneqarsinnaanngitsumik taama nassuerpoq, Nunatsinni taarsiivigitittarneq pillugu aalajangersaasartut siulittaasuat Søren Søndergaard Hansen.

Kalaallit arnap 2005-imili persuttarneqareernermi kingorna Nunatta Eqqartuussiviatigut taarsiivigineqarnissani siunertaralugu suliassanngortitsinera arriippallaamik kukkunertaqaqisumillu suliarineqarsimasoq Folketingip ombudsmandianit Lars Gammeltoft-Hansenimit isornartorsiorneqarpoq.

- Suliap uuma suliarineqarnerani kukkunernik arlalinnik iliuuseqarsimavugut aammalu suliassaq piffissap ingerlanerani sivisuallaamik uninngatissimallutigu, tamanna nassuerutigisariaqarparput, Søren Søndergaard Hansen oqarpoq.

Kalaallip arnap 2005-imi persuttarneqarnermi kingorna taarsiiffigitinnissani siunertaralugu Nunatta Eqqartuussivianut suliassanngortitsigami ukiut tallimat aatsaat qaangiutillartullu suliaq aallartinneqarpoq.

Arriippallaamik suliarineqarnerata saniatigut arlalinnik kukkusumik innersuussisoqartarsimavoq. Ilaatigut illersuisoq suliassarinngisaanik suliakkerneqarsimavoq.

- Suliap ingerlannissaanut arnamut illersuisumut paasiniagassat suliassarinngisai suliaritissimavagut, tassalu tamanna uagut tungitsinnit kukkuneruvoq, Søren Søndergaar Hansen oqarpoq.

Kukkunerit ilagaat Nunatsinni taarsiivigitittarneq pillugu aalajangersaasartut oqartussaqarfimmut kukkusumut illersuisoq paasiniaaqqusimammassuk.

- Sooq taama suliakkerneqarsimaneranut nassuiaatissaqanngilanga, taamaallaalli oqarsinnaavunga suliat ikilisarneqarnissaat isumagalugu taanna suliakkersimagatsigu, Søren Søndergaard oqarpoq, neriorsuillunilu maannamiit suliassat piaarnerusumik suliarineqartalissasut.

- Suliassat amerliartuinnartut ikilisarlugit maanna suleruttulerpugut. Ukiup massuma naannginnarani suliassat ikiligaatsiarnissaat neriorsuutigissallugu maanna pissutissaqarluarpunga, Nunatsinni taarsiivigitittarneq pillugu aalajangersaasartut siulittaasuat, Søren Søndergaar Hansen oqarpoq.

Illersuisut namminneerlutik paasiniaasarnissaat siunissami pinngitsoortinniarlugu, Danmarkimi inatsiseqarneq pillugu ministeriaqarfiup Nunatsinni taarsiivigitittarneq pillugu aalajangersaasartut oqaloqatiginiarpai, aammalu suliat qanoq sivikinnermik suliarineqartarsinnaanersut pillugu oqaloqatigineqassallutik.