Suliumajunnaarnissaq qanilliartorpoq

Air Greenlandip sulisoqarnermut pisortaa, Mads B. Christensen, KNR-imut oqarpoq, Flymekanikerit Kattuffiat, Dansk Metal, suliumajunnaarnissamik Air Greenlandimut ilimasaarisimasoq.

- Suliumajunnaarnissamik ilimasaarineq tupaallannartuuvoq, Mads B. Christensen oqarpoq, Air Greenlandimi tungaanniit isumaqarsimagaluarpugut isumaqatigiinniarnerit ajunngitsumik ingerlasut.

Flymekanikerit suliumajunnaarnissamik ilimasaarineranni timmisartumi saqisut suliumajunnaarnissamut tapersiiniarlutik aamma nalunaaruteqarsimasut Mads B. Christensen oqarpoq.

Flymekanikerit Katuffiata Dansk Metalip KNR-imut oqaatigaa suliumajunnaarnissaq suli ullulerneqarsimanngitsoq, tamannalu Air Greenland peqatigalugu isumaqatigiissutigineqarumaartoq. Suliumajunnaarnissarli pisappat ilimanarsinnaasoq Apriilip aallartilaarnerata kingorna pisinnaasoq.

Flymekanikerit akissarsiaat pillugit isumaqatigiissut maanna atuuttoq apriilip aallaqaataata tungaanut atuuppoq. Pisoq pillugu Air Greenland annertunerumik oqaaseqarsinnaanngimmat, suliumajunnaarnissamut ilimasaarineq pillugu aqagu tusagaqaqqissaagut.

Jon Wilche flymekanikeret isumaqatiginiarnernut aallartitaat oqaaseqartinniaraluaratsigu, aqaguutinnagu oqaaseqarusunngilaq.