Sulisut toqqissisimanngillat
Allattoq Carla Davidsen
Arctic Umiaq Linemi sulisut ullumi sulinertik unitsikkallarlugu ataatsimiipput, ilaasullu Nuummiit kujammukartussat akunnerit marlussungajaat talittarfimmi utaqqipput.
Arctic Umiaq Line tuniniarneqassappat imaluunniit namminersortunngorsarneqassappat tamanna sulisunit toqqissiunnaassutigineqartoq, sulisut oqaaseqartartuat oqarpoq.
Adam Nielsen oqarpoq naalakkersuisut Arctic Umiaq Linep tuniniarneqarnissaanut sukkavallaamik aalajangersimasut tamannarpiarlu pillugu sulisut ilaatigut ataatsimiissuteqarsimasut:
Sulisut sulinertik unitsillugu ataatsimeeqqissagaluarpata tamanna ilaasussanut aamma sunniuteqariaannaasoq oqaatigineqarpoq. Qaquguli ataatsimiittoqaqqissanersoq oqaatigineqarsinnaanngitsoq, Adam Nielsen oqarpoq.