Sulisut sinniisuat: KNR-imi torersumik sulisoqarpoq
KNR webimi aaqqissuisup Partii Inuit siulittaasuat kusanaatsumik allaaseralugu emailimik kukkulluni ippassaq nassitsisoornera pillugu suliaq suli ingerlavoq. Emaili pineqartoq tusagassiuutinut Partii Inuillu siulittaasuannut Nikku Olsenimut nassiuttoorneqarpoq.
Webimi aaqqissuisoq kingorna soraarsitaavoq, KNR-ilu Nikku Olsenimut aamma utoqqatsissuteqarluni. Webimi aaqqissuisup Nikku Olsen nammineq aamma utoqqatserfigaa, naalli utoqqatsissut Partii Inuit siulittaasuanit tiguneqaraluartoq, KNR-imi sulisup akerartuinera sunnguamilluunniit akuersaarneqarsinnaanngitsoq, Nikku Olsenip oqaatigaa.
Suliamut atatillugu pineqartut kisiisa utoqqatserfigineqarnerat Atassutip naammaginngilaa, KNR-illi akerlianik Nunamut tamarmut utoqqatsernissaa piumasaralugu.
Kultureqarnermut Naalakkersuisoq Nick Nielsen oqallinnermut maanna aamma akuliuppoq, Nunattami nammineq tusagassiorfiutaata KNR-ip tatiginassusaa suliamut atatillugu ilungersunartorsiortinneqartoq, Nick Nielsen oqarpoq:
- Taamaattumik uanga KNR-ip siulersuisui pisussaaffilersimavakka tuaviortumik nassuiaasiornissaannut, nittartakkami aaqqissuisumut tunngasoq tusagassiortutut tamatigoortuusinnaassutsimik eqqortitsisinnaannginnermi kisermaajunersoq pillugu, imaluunniit pissusilersorneq akuerineqarsinnaanngitsumik KNR-imi tusagassiorfittut ingerlatsinermik tunngaveqarnersoq pillugu, Nick Nielsen ilaatigut allappoq.
KNR-illi nutaarsiassaqartitsiviani sulisut sinniisuata Apollo Jeremiassenip erseqqissaatigaa pisoq una immikkuullarissuusoq:
- Taamatut pissusilersortoqarneq ajorpoq. Uagut una suliffigaarput, politikerit oqaloqatigisartakkavut pillugit maani sulivugut, aamma inuinnaallumi allat oqaloqatigisartakkavut maani sulivugut. Taamaattumik taakkununnga inussiarnernissaq pingaartutut isigiaarput, KNR-ip nutaarsiassaqartitsiviani sulisut sinniisuat Apollo Jeremiassen oqarpoq.
KNR-ip pisortaata Søren Lennert Mortensenip pisoq KNR-imut ilungersunarluinnartutut aamma nalilerpaa, malittarisassallu unioqqutinneqarsimanerat aamma oqaatigalugu.
KNR-imili sulisut pissuserissaartuunerat taassuma aamma erseqqissaatigaa:
- Immikkuullarissumik pisoqarsimasutut nalilerpara, sulisullu ataatsip mianersuaalliorsimaneranik takussutissaalluni, kukkusumik iliuuseqarsimaneranik takussutissaalluni, KNR-ip pisortaa Søren Lennert Mortensen oqarpoq.
KNR-ip siulersuisuini siulittaasup Hans Peter Poulsenip pisoq aamma ajuusaarutigaa, siulersuisullu pisoq pillugu nassuiaasiornissaat maanna aallartinneqareersoq oqaatigalugu:
- Taamatut pisoqarnera siullermik soorunami siulersuisuninngaanniit utoqqatsissutigissavarput. Taama oqareerluta nalunaarusiaq isumaqatigiinnerput malillugu suliarisussaavarput, isumaqatigiinnerpullu malillugu naammassereerpat siulersuisuni eqqartussavarput, siulersuisuni immikkut ittumik ataatsimiilluta eqqartoreerutsigu Naalakkersuisoq Nick Nielsen ilisimatissavarput qanoq pisoqarsimanersoq, KNR-ip siulersuisuini siulittaasoq Hans Peter Poulsen oqarpoq.