Sulisut napparsimakulasarnerat inuiaqatigiinnut akisoqaaq
Kommuneqarfik Sermersuumi inuussutissarsiornermut siunnersuisoqatigiinni ineriartortitsinermut siunnersortip Morten Winther Nielsenip eqqoriarpaa sulisut napparsimakulanerat inuiaqatigiinnut milliardilikkaanik naleqartartoq. AG taama allaaserisaqarpoq.
Sulisut napparsimasarnerat pillugu kisitsisit sukumiinerusumik nalunaarsorneqarneq ajoraluartut, Morten Winther Neilsenilli oqaatigaa suliffeqarfiit attaveqarfigisartakkani kisitsisaatigisaraat, taakkualu oqartartut sulisut napparsimakulaqisut.
Sulisoqarnermullu politikki sukateriffigineqanngippat ajornartorsiut piujuaannassasoq, taassuma ernummatigaa:
- Sulisoqarnermut politikki sukateriffigineqarpoq. Taamaaliortoqanngippat Kalaallit Nunaannut milliardilikkaanik naleqassaaq. Assersuutigalugu Halibut Greenland sulisunik 25-nik Ilulissani pissarsinissaminik siorna ajornartorsiuteqarpoq, naak suliffissaaleqisut 300-t missaanniikkaluartut. Ajornartorsiut aaqqiivigineqanngippat Kinamiunik sulisoqartariaqarnissaq eqqarsaatigineqarsinnaavoq, tamannalu inuiaqatigiit aningaasaqarniarnerannut sunniuteqapilussinnaavoq, Morten Winther Nielsen AG-mut oqarpoq.
Suliffimmik paarsilluarnissaq taamaammat pingaaruteqartoq, taassuma oqaatigaa, utoqqaallu amerliartuinnavittussaanerat eqqarsaatigalugu taakku pilersorneqarsinnaanissaat aamma eqqarsaatigineqartariaqartut oqaatigalugu.
