Sulisussaqarniarneq politiini ajornartorsiutaavoq
Nunatsinni politiiuneq sakkortuvoq, sulinngiffimmi suliartoqqusaariataartarneq ilaatigut peqqutaalluni, aammali politiit suliffeqarfinnit allanit unammillerneqarput, politiit ilinniagarissaartut akissarsianik pitsaanerusunik neqeroorfigineqartarmata.
Taamaammat politiinngorniat ilinniarfiannut qinnuteqartut amerleriarsimaneri ajornartorsiummik aaqqiissanngitsoq, politimesteri Bjørn Tegner Bay oqaluttuarpoq:
- Inissiffik eqqumiilaarpoq. Tassami inatsiseqarnermut ministereqarfik politiillu naalagaaffimmi pisortaat paasilluarsinnaagaluarpaat isumaqataallutillu, Kalaallit Nunaanni politiiusugut amerlanerulertariaqartugut. Taamaammat politiinngorniarfimmi piukkunnartut tamaasa atorfinitsissinnaavagut. Aamma Danmarkimi sulisussarsiorsinnaavunga. Ajornartorsiutaaginnartoruna, inunnik pitsaasunik sulisussarsinissaq. Sulisussarsisinnaagutta aamma Kalaallit Nunaanni politeeqarfiit inuttassaaleqinerat anigussavarput, politimesteri Bjørn Tegner Bay oqarpoq.
Rasmus Larsen Nunatsinni politiini ukiualuit matuma siorna sulivoq, Fynilli politiivini maanna sulilluni. Taassuma Nunatsinni politiiuneq nuannersuinnaaneq ajortoq oqaluttuaraa:
- Danmarkimi sulinngiffeqaraangatta sulineq ajorpugut, Nunatsinnili sulinngiffeqaatigaluni sillimasuuneq qulangiusimasarpoq. Tassalu pisoqarpat, sianerfigineqarsinnaasarpugut. Aamma arlaannik pisoqaraangat suleqallu ikiortissamik pisariaqartitsippat, aggeqqusaasarpugut. Annertunersumillu pisoqarpat, suleqatit amerlanerusut pisariaqalertarput, taamaaligaangallu sulinngiffeqartut aamma aggersarneqartariaqartarput, taamaammallu ilaquttat ikinngutillu eqqugaasarput, nalunartarmat taakkua qaqugukkut piffissaqarfigineqarsinnaanersut, Rasmus Larsen oqaluttuarpoq.
Politiillu ilinniagaat suliffeqarfinni allani piumaneqarnerat pissutsinut iluaqutaanngisoq, politimesteri Bjørn Tegner Bay oqaluttuarpoq:
- Suliffeqarfitsinni nammineerluta tamatigoortumik atorneqarsinnaasutut pitsaasutullu ilinniartitsiviusartutut allanit ilisimaneqartumik ilinniarfeqarnitta ajoqutaasa ilagaat, suliffeqarfiit allat ilinniartinnikuusavut sulisoriumasartupilussuummatigit, Bjørn Tegner Bay oqaluttarpoq.
Naak politiiit pikkorissut sulisoriinnarnissaat unammillernaraluartoq, ilinnialersussat Bjørn Tegner Bayip isumalluarfigai:
- Kalaallit Nunaanni suleqatima sulisussarsiornerulersimanerisa kinguneraat, inuusuttut pikkorissut piukkunnartullu eqqumaffigineqarnerulersimanerat. Tassalu isumaqarpunga, allamut suliffissarsioqquinnagassagut ikinneerarsuussasut, politimesteri Bjørn Tegner Bay oqarpoq.
Politiinngornialerlaat aappaagu aggustip aallaqqaataani aallartinnginerminni, atuagarsornikkut suliassatigullu allatigut misilitseqqaassaapput.
