Sulisussanik nunanit allaneersunik tikisitserusupput
50-it eqqiaasutut 200-nillu amerlanerit igaffimmi ikiortitut igasutullu sulipput. Inuussutissarsiornermut naalakkersuisoqarfik KNR-imut taama paasissutissiivoq.
Nunani allamiut nunatsinnut suliartortarrnerannut inatsit unioqqutinneqartarsimanerat pillugu inatsisip unioqqutinneqartarsimanissaa Inuussutissarsiornermut naalakkersuisoqarfimmit pasitsaanneqarpoq.
Politiit, kommunit Naalakkersusoqarfillu suleqatigiillutik maana iliuuseqarnialerput.
Kalaallit Nunaannut suliffissarsiortut killilersimaarnissaat pillugu inatsimmi siunertaavoq, Siunertaq: ”Inatsisartut inatsisaata matuma siunertaraa sulisinnaasut Kalaallit Nunaanniittut suliffissanut maaniittunut siulliusussaatitaanerisa qularnaarneqarnissaa.”
Tassalu sulisitsisoq sulisussamik nunani allaniit tikisitsiniartoq kommunimut qinnuteqaqqaareerpat, kommunillu nunatsinneersunik sulisussaqanngitsoq qulakkeereerunikku, qinnuteqaammut aatsaat akuersisinnaatitaapput.
Naatsorsueqqissaartarfiup ukioq manna juulip aallaqqaataani naatsorsuuineri naapertorlugit nunani allamiut inuit assigiinngitsut 42-t nunatsinniittut 1000-it missaanniipput. Taakkua maleranersaat Skandinaviameersuupput Islandimiuullutilluunniit. Aammali Thailandimiut, aasaq 145-uusut Filipinerineersulllu, aasaq 95-iusut, amerliartorput.
Nunat allamiut 2009-mi 203-t, 2010 260-it ukioq mannalu novembari tikillugu 348-t nuatsinnut suliartornissamut akuersissummik pisimapput.
Kisitsisit ukioq mannameersut misissuataaraanni, Kommuni kujallermi inuit aqqanillit, Kommuneqarfik Sermersuumi inuit 203-t, Qeqqata kommuniani inuit 30-t, Qaasuitsup Kommunianilu inuit 121-t sulisinnaanermut akuersissuteqarlutik sulilersimapput.
Suliartorsinnaanermut akuersissut ukiumi ataatsimi atuuttarpoq. Nunani allamiut 40-t 50-illu akornanniittut aappaagukkut qinnuteqartarput.
Nukissiuutinik sanaartornermut atatillugu suliartortut 44-pput, ilaqutaasutut tikittut 97-iullutik.
Igasut 2009-mi 78-it, 2010-mi 63-it 2011-milu novembarip qiteqqunnerani 65-it.
Eqqiaasutut suliartortut 2011-mi 25-iupput.
Politiini, Kommuneqarfik Sermersuumi Inuussutissarsiornermullu Naalakkersuisoqarfimmi nunani allanit suliartortartut akuersissummik pisimasut nalunaarsorneqarsimasut kisitsisitigut annertuumik nikigapput.
2011-mi novembarip 14-at tikillugu Inuussutissarsiornermut Naalakkersuisoqarfiup kisitsisaataat malillugit Kommuneqarfik Sermersuumi 203-it akuersissummik pisimapput. Kommunilli nalunaarutigisaani 46-t akuersissummik pisimallutik.
