Sulisunut ineqartitsineq annikillisaaffigissavaat

Kommuneqarfik Sermersuumi pisortaqatigiit inissialerisoqatigiinnik pilersitsisimapput, aasaq nallertinnagu suliassaqarfiusumik qulaajaasissanik. Aamma sulisunut inissanut tunngatillugu kommunimi malittarisassanik aaqqissuusseqqinnissamut siunnersuuteqassapput.
Allattoq Mads Lynge
apriilip 18-at 2011 07:55

Nuummi inissiat pillugit suleriaatsimik sukaterisoqarpoq. Atorfiit ilaasa imminut isumagisumik, tassa automatiskimik, inissiaqartumik inuttassarsiuunneqartarnerat pillugu kommunimi malittarisassat atuuttut atorunnaarsinneqassasut, Kommuneqarfik Sermersuumi allaffisornermik suliaqartut aalajangerpaat. Kommuneqarfik Sermersuup nittartagaani tamanna atuarneqarsinnaavoq.

Atorfinnik qulit missaanniittunik qaammammut inuttassarsiuisarnermut taarsiullugu amerlanerpaamik tallimanik atorfinnut inuttassarsiuisoqartalernissaa naatsorsuutigineqarpoq.

Nuummi sulisunut inissiat pillugit pissutsit piffissami kingullermi ilungersunarsiartorsimapput, utaqqisutut allatsissimasut amerlisimapput, initaarnissamullu sivisunerusumik utaqqisoqartalernikuulluni.

Sulisunut inissiani initaarniaraanni ukioq ataaseq angullugu utaqqisoqartarpoq, utaqqiisaasumillu inissiamut iserternissamut qaammatit pingasut angullugit utaqqisoqartarsinnaalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq