Sulisitsisut peqatigiiffii isumaqatigiinngillat
Tunngaviusunik qanoq aningaasaliiffigineqartarnissaa SIK-p paaseqqaarusuppaat, SIK-ip ilaasortaasa akunnerni aningaasaliiffigineqartarnerat eqqugaasinnaammat. Sulisitsisut Peqatigiiffiata siunnersuut tapersersorpaat, taamakkaluartoq Nunaqavissut Suliffiutillit Kattuffiisa NUSUKA Naalakkersuisut ilutigalugit siunnersuut akerleraat.
- Aningaasaateqarfiliornissaq apeqqutaalluinnarpoq qanoq ilusilersorneqarnissaa aamma ilaasortagut qanoq annertutigisumik akiliitinneqartarnissai. Isumaqatigiinniarneq eqqarsaatigalugu, assersuutigalugu ilaasortaq akunnermi ataatsimi 50 koruunimik akiliisittarneqassappat, taakuusapput akunnermi ataatsimi akissarsiaqarnermi qaffaatissaagaluartut aningaasaateqarfimmut illuartittariaqakkagut. Tassa aningaasaateqarfiliortoqassappat taava akissarsianut aningaasartuutit tamakkiisut qaavatigut tunniisisoqartariaqassaaq, taamaasillugu akunnermi aningaasanik qaffaatissaraluit innarlerneqassanngimmata, Jess G. Berthelsen oqarpoq.
Siunertaavoq meeqqat inoorlaat inuunerminni aallartilluarnissaat, angajoqqaanngorlaat suliffeqarfiillu minnerit aningaasatigut artukkerneqarpallaannginnissaat, tamanna Sulisitsisut Peqaatigiiffiata isumaqataaffigaat Namminersorlutik Oqartussat, sulisitsisullu sulisunullu isumaqatigiinniarnissamik ammaassimmat.
- Namminersorlutik Oqartussat sulinerlu pillugu kattuffit suleqatigiillutik aaqqiissutissarsioqatigiinnissaat siunniuneqarpoq. Taamaaliorniarniarneq isumatusaarneruvoq, neriuppugullu taamaaliornissaq, siunnersuutip appassaaniinnginerani ataatsimiititaliani sulinermi taperserneqassasoq, Brian Buus Pedersen GA-mi pisortaq oqarpoq.
Urani inatsisartuni tallimanngormat oqallisigineqaruttortoq aamma ilaatigut aningaasaateqarfiliornissaq oqallisigineqarpoq. Aningaasaateqarnermut naalakkersuisoq Vittus Qujaukitsoq siunnersuut tapersersunngilaa, kattuffiit isumaqatigiiniarneranut innarliisinnaanera ernummassutigimmaguk, tamannalu Nunaqavissut Suliffiutillit Kattuffiata isumaqataaffigaa, taamaattumik siunnersuut akerleralugu.
-Tunngaviusumik taamatut isikkoqartillugu akuersaanngitsutut ipparput. Tassa una pinerugatsigu, kattuffiit isumaqatigiinniartarnerisa iluanni ingerlasarnera taanna innarlernaveersaarlugu ingerlasussaagattam, Gerth B. Lynge taama oqarpoq.
Aningaasaateqarfiliornissamut siunnersuut inatsisartuni aappassaaneerneqannginnermini Aningaasaqarnermut Akileraartarnermullu ataatsimiitsitaliamut suliassanngortinneqarpoq.