Sulisitsisut Peqatigiiffiat Siumumit illuatungilerneqarpoq

Nalunaarusiami inerniliussat ilaat marluk Siumup siulittaasuata immikkut maluginiarsimavai, tassa akileraarutit akitsuutillu qaffanneqartariaqarsinnaanissaannut innuttaasullu nunassittarnerisa allanngortinneqartariaqarsinnaanissaannut sulisitsisut innersuussutaat.

Innersuussutigineqartulli taakku marluk Siumup illuatungilerpai.

Pisortat aningaasartuutaasa isertitanut naleqqiullugit qaffasinnerunerat nalunaarusiami isorineqarput, akileraarutitigut isertitat aningaasartuutillu assigiinnginnerujussuat aarlerigineqarluni.

Innuttaasulli nunassittarnerinut tunngatillugu Siumut Sulisitsisut Peqatigiiffiata innersuussutaannut illuatungiliuppoq:

- Nunaqarfiit aningaasartuutaappat? Illoqarfiit tamarmik aamma aningaasartuutaapput. Nuuk aningaasartuutaavoq, Sisimiut aningaasartuutaapput, Qaanaaq aningaasartuutaavoq. Illoqarfiit tamarmik aningaasartuutaapput, pisortanit aningaasalersorneqarlutik. Illoqarfiit nunaqarfiillu imminut akilersinnaasuinnarmik ingerlasut sumi nunanmi takuneqarsimava? Piviusut tunngavigalugit sulisariaqarpugut, Aleqa Hammond oqarpoq.

Akileraarutit akitsuutillu qaffanneqarnissaat Siumup aamma anguniagarinngilaa:

- Siunertaq erseqqissaartoq aalajangersimasorlu anguniassagaanni akileraarutit akitsuutillu qaffanneqassapput. Periarfissat kingullerpaat aatsaat atorlugit akileraarutit akitsuutillu qaffanneqassapput. Tamanna pingaaruteqarpoq erseqqissaassutigissallugu. Akileraarutitigut akiliissutigisartagarput annertoreeqaaq, Aleqa Hammond oqarpoq.

Kalaallit Nunaat qaqugu Namminersulivissinnaassanersoq taassuma eqqoriarsinnaannginnerarpaa, qinikkalli innuttaasullu akornanni tamanna pillugu isumaqatigiittoqarpat aatsaat tamanna anguneqarsinnaasoq oqaatigalugu.