Sulisitsisut Peqatigiiffiat: Air Greenland eqqorneqassappat ajussaqaaq
Isumaqatigiinniarnerit isumaqatigiissuteqarfiunatik juunip ulluisa tallimaanni naammassimmata, Timmisartumi Saqisut Peqatigiiffiat sinnerlugu Danmarkimi Atorfillit Kattuffiat juunip ulluisa 15-ianniit akuerisaasumik suliumajunnaarnissamik aarlerisaaruteqarpoq. Air Greenlandimit imaaliallaannaq akivoq namminneq timmisartuutiminni saqisut juunip ulluisa 19-ianniit aamma suliumajunnaassasut.
Timmisartumi saqisut suliumajunnaaqqunagit Sulisitsisut Peqatigiiffiata maanna kaammattorpai. Inuppassuimmi suliumajunnaarnermit inuppassuit eqqugaanissaat ernummatigaat, timmisartuutileqatigiiffik taakkununnga angallatissatuaasinnaammat. Sulisitsisut Peqatigiiffiat aamma isumaqarpoq akissarsiat qaffanneqarnissaannik maannakkut piumasaqarneq naatsorsornerluinerusoq, Nunatsinnimi aningaasqarniarnikkut pissutsit imaammata, akissarsiat annertuumik qaffanneqarnissaannut maannakkorpiaq tikkuartuinatik.
Naalakkersuisunngorlaat aallartilluarnissaat naallerneqassaaq, inuiattut juunip ulluisa 21-anni nalliuttorsiornissatsinnut namminersornermillu eqqussinissatsinnut malunnartitsinissamut pilersaarutinik taamaatitsisariaqalersinnaammata, Sulisitsisut Peqatigiiffianni siulittaasoq, Henrik Leth allappoq.
Illuatungeriit isumaqatigiinniarnerit ingerlanneqarneranni oqaaseqarumanngillat, taakkuli ilungersorlutik isumaqatigiinniarsarippoq, Air Greenlandimit ilisimatitsipput.