GE-p aningaasanut inatsisiliorneq isornartorsioraa: Suleqatiginnittoqartariaqarpoq
Aningaasanut inatsisissaq pillugu Naalakkersuisut partiillu isumaqatigiinniarnerat naammassineqangajalerpoq, naatsorsuutigineqarporlu aqagu arfininngornermi isumaqatigiinniarnerit naammassineqassasut.
Naalakkersuisut politikkikkut naammassisaqarusunnerminnik aallussivallaartut aammalu Inatsisartuni politikerit isumaannik naaperiaaniarpallaartartut GE isumaqarpoq. Politikerit puigortarpaat aningaasanut inatsisissap ilusilersorneqarnerani inuiaqatigiinni avatangiisitik pingaaruteqarluinnartuusut.
Mittarfissat takornariaqarnerlu pillugit iliuusissanik maqaasipput
Nunatsinni sulisitsisut peqatigiiffianni GE-mi pisortaq, Christian Keldsen matumani assersuutitut tikkuaavoq Qaqortumi, Nuummi Ilulissanilu mittarfissat naammassineqangajaleraluartut atulerneqareernerisa kingorna sunniutaasussat pillugit oqaloqatigiinnerunissaq amigaataanerarlugit.
- Mittarfissat mittarfeqarfissallu nutaat ammarneqarnissaat ukiut marluk pingasullu missaat qaangiuppata pisussaavoq. Tassunga tunngatillugu iliuuseqanngiinnartoqarsinnaanngilaq naatsorsuutigalugulu allat isumagiumaaraat. Suleqatigiittoqartariaqarpoq, inatsisissamilu tamanna takusinnaanngilarput, GE-p pisortaa, Christian Keldsen uparuaavoq.
Tassunga tunngatillugu takornariaqarnerup ineriartortinneqarnissaanut tigussaasunik takusaqarsinnaannginnerarluni ilanngullugu uparuaavoq:
- Aningaasanut inatsisissatut siunnersuummi takusaqarsinnaanngilanga takornariaqarnerup ineriartortinneqarnissaanut annertusarneqarnissaanullu tunngatillugu tigussaasumik qanoq pilersaaruteqartoqarnersoq. Suliassaqarfimmi naatsorsuutigisat erseqqissaatigineqarpata , takusinnaagutsigulu pisortat tungaannit qanoq aallussisoqarnissaanik pilersaaruteqartoqartoq, taava aamma inuussutissarsiuteqartut suliassamik isumaginnilluarnissaminnut tunngavissaqassapput, Christian Keldsen KNR-imut oqarpoq.
Aaqqissuusseqqinnerit pisortallu ingerlatsinerannut pilersaarutit amigaatigineqarput
Alla sulisitsisut uparuagaat tassaavoq aaqqissuusseqqinnissat aammalu pisortat ingerlatsiviat ataatsimut isigalugu qanoq pilersaaruteqarfigineqarnersut pillugu inatsimmi erseqqissuliortoqannginnera.
- Akileraartarnikkut aaqqissuuseqqinnissaq, isumaginninnikkut aaqqissuusseqqinnissaq aammalu ilinniartitaanikkut aaqqissuusseqqinnissaq minnerunngitsumillu aamma pisortat ingerlatsinermut allaffissornermullu aningaasartuutaasaasa aqunneqarluarnerulernissaannik pilersaaruteqarnissaq amigaatigisatta ilagaat.
Taamaattorli aamma Sulitsisut pingaartilluinnarlugu iliuuseqarfigeqqusaat tassaavoq nunatsinni atukkatigut assigiinnginnerujussuup annikillisarneqarnissaanik pilersaaruteqartoqarnissaa:
- Tamanit pingaarnerpaaq; piffissami matumani atukkatigut assigiinngitsorujussuarmik inissisimanerup qimanniarneqarnissaa pillugu pilersaarutinik tigussaasunik takusaqarsinnaanngilagut. Suliassaq taanna pimoorullugu aallunneqartariaqalerpoq innuttaasut inuulluarlutik imminnut napatissinnaanissaminnut periarfissinneqartariaqarmata, Christian Keldsen Sulisitsisut peqatigiiffianni GE-mi pisortaq oqarpoq.
