Sulisitsisut: Naalakkersuisoqatigiinnissamut isumaqatigiissut ersarluppoq
Naalakkersuisoqatigiilersussat Inuit Ataqatigiit Naleqqallu isumaqatigiissutaanni aalisarnermi suliassatut allagaanni ersarinnerusuliornissaq tiguussaanerusuliornissarlu Sulisitsisut amigaatigigaat, inuussutissarsiortut kattuffianni pisortaq oqarpoq.
- Maannamut takusinnaasagut tiguussaasuunngillat, isumaqatigiissutip imaasa nassuiarneqarnissaat qanorlu oqaasertalerneqarnissaat utaqqivagut.
Christian Kjeldsen KNR-imut oqarpoq.
Naalakkersuisoqatigiilerusuttut isumaqatigiissumminni allapput, Naalakkersuisoqatigiit ilisimaarigaat, aalisarnermi pissutsit allanngortinneqartariaqavissorneri. Kisianni sutigut allanngortinneqartariaqavissorneri itisilerneqanngillat.
Kisianni aamma allapput, susassaqartut peqataatillugit allannguutinik suliaqarnissaq sulinermi toqqammavissasoq.
AAMMA ATUARUK IA: Aalisakkat imartatsinniittut aalisartunit nunatsinneersunit aalisarneqassapput
Tamannalu Sulisitsisut isumalluaateqarfigaat:
- Aalisarnermulli inatsisissaq pillugu sulinermi aalisarnermik soqutigisalinnut suleqateqarusunnerat nuannersuuvoq.
Sulisitsisut aalisarneq pillugu ataatsimiititaliarsuarmi ilaasortaatitaqarput. Aalisarnerullu sutigut allanngorfeqarnissaanik kissaatitik tassuuna apuuttarpaat. Taamaammat allannguutissatut kissaatiminnik maanna oqaaseqarumanngilaq.
Kisianni aalisarnerup ukiorpassuarni ineriartornermini maanna naammaassisaqarfiulluarnera aalisarneq pillugu inatsisissami qulakkeerneqassasoq kissaatigaat.
- Aalisarneq naammassisaqarfiulluartumik ullumikkut ingerlavoq, tamanna nunap karsianut nunarsuarmilu niuffattunut unamminitsinnut iluaqutaavoq, Sulisitsisut pisortaat oqarpoq.
KNR-ip aalisarnermut piniarnermullu naalakkersuisussatut innersuussaq, Aqqaluaq B. Egede, attaveqarfigigaluarpaa, taannali partiimi siulittaasuminut innersuussivoq. Múte B. Egede ippassaq marlunngornemi piffissaqarnani oqarpoq.