Sulisitsisut anorersuarnerani: Sanaartorfiit piareersimapput
Paamiuni Nuummili anorersuartorsuuvoq, politiillu ippassarli innuttaasunut suliffeqarfinnullu nalunaaruteqarput, pigisatik atortutillu qajannaarsussagaat.
Tassani pineqarlutik angallatit, pississaartarfiit tranpoliinat aamma, pisattat silami atorneqartartut.
AAMMA ATUARUK Anorersuartorsuuvoq: Nuummi Paamiunilu atuarfiit matupput
Anorersuarnerani sanaartorfiusuni isumannaallisaanermut maleruaqqusat atuutsinneqalerput.
Sulisitsisut pisortaata Christian Keldsenip nassuiaatigaa, anorersuarmik aarlerisaaruteqartoqartillugu sanaartorfinni immikkut ittumik piareersimasoqartartoq.
- Sanaartorfinni amerlanerni torersaajuartarput, anorersuartoqarnissaanillu aarlerisaarisoqartillugu, immikkut ittumik ilisaajaasarput, atortullu annertuut qajannaarsorneqartarput, anorimit tingitaannginniassammata.
Christian Keldsen taama oqarpoq imalu itisiliilluni.
- Suleriaatsit nalinginnaasut malinneqartarput, soorlu tassa biilinut ikigaanni isumannaallissaanermut qitequt atineqartartoq, Christian Keldsen Sulisitsisut pisortat oqarpoq.
Nuummi bussit ingerlaarnerat unitsinneqarallarput.
Nuummi Paamiunilu atuarfiit nalunaaqutaq ataatsimut matuneqarput
Kalaallit Nunaanni politiit KNR-imut oqaluttuarput, anorersuarnerani atortut pigisallu tingigussaasimanerannik taamaallaat nalunaarfigineqarsimallutik.
Ajunaartoqarsimaneranik ajutoortoqarsimaneranillu nalunaaruteqartoqarsimanani.
Kommunqarfik Sermersooq mail-ikkut nalunaaruteqarluni allappoq, Paamiuni timersortarfik matuneqarsimasoq, isersimaffiginissaanut isumannarmat.