Sulisitsisut: Angutit arnanit sulinerusarput

Angutit arnanut sanilliullugit ukiumut aningaasanik qaloornerusarput.

Tamanna Kalaallit nunaanni naatsorsueqqissaartarfiup kisittsisaataani takuneqarsinnaavoq.

Qanorliuna ilillutik angutit arnaniit aningaasarsinerusartut?

- Tamanna ukiumut tiimit suliffigisat qanoq amerlatiginerannik nassuiaatissarsineqarsinnaavoq, Henrik Leth Kalaallit Nunaanni Sulisitsisut Peqatigiiffianni pisortaq tikkuussivoq.

Suiaassutsit akornanni isertitatigut annertuumik nikingasoqarnera Henrik Lethip assigiinngitsunik nassuiaatissaqarnerarpaa.

- Imaanngilaq aningaasarsiat assigiinngissuteqartut, kisianniliuna tiimit suliffiusut assigiinngissuteqartut, Henrik Leth oqarpoq.

Taasumattaaq ilimagaa sulisut ukiui ilinniagaqarsimanerallu aningaasarsiat nikingassutaannut pissutaaqataasinnaasut.

- Soorunami inuit ilaat tiimikinnerusimagunik ukiumut aningaasarsiakinnerussapput, ilinniakkatigut qaffasissutsit assigiinnginneri malillugit aningaasarsiat, meerartaarnermi sulinngiffeqartarnerit, ukiuni qanoq amerlatigisuni sulisimaneq, immaqa angutit ilinniarsimasut amerlanerunerat, allarpassuillu pissutaasinnaapput, misissorneqarnikuunngimmata uppernarsaatissaqartinnagillu toqqaanarlugu suna pissutaarpiarnersoq oqaatigisinnaanngilara, Henrik Leth oqarpoq.

Taassuma erseqqissarpaa isumaqatigiissutit malillugit aningaasarsiaqartitsineq, Kalaallit Nunaanni Sulisitsisut Kattuffianni aaliangersagaareermat, aningaasarsiat naligiinnginnerannut peqataanatik.

- Ilaasortatsinnut aaliangersimasumik aningaasarsiatigut isumaqatigiissuteqareeratta, suliat assigiit akornanni aningaasarsiatigut assigiinngisitsineq maani atuutinngilaq.

Kalaallit Nunaanni Naatsorsueqqissaartarfiup naatsorsugaanni arnat angutillu aningaasarsiaasa nikingassutaat 40 procentiusoq takuneqarsinnaavoq.

Radioaviisimi ippassaq unnukkut nutaarsiassaq malillugu akissarsiat nikingassutaat taamaallaat 25 procentip missaanaaniippoq.