Sulinngitsoortarnerup iliuuseqarfiginissaa Nusukap oqallisigitikkusuppaa
- Piffissangorpoq imminut qiviarluta ammasumik eqqartussagipput suliffeqarfiup sulisartut pisariaqartikkaluarlugit akissarsinerit kingorna aammalu allanik ”patsiseqarluni” suliartungitsoortoqartarnera, nunaqavissut suliffiutillit kattuffianni siulittaasoq oqarpoq.
Sulisorisat aalajaatsuunngitsut pissutigalugit suliffeqarfiit kaaviaartitamikkut annertuumik annaasartaqartut Gerth Lyngep tikkuarpaa, tamatumalu allanngortinneqarnissaa maanna kissaatigalugu.
Imminnut naalagarisut amerlavallaartut
- Sulisartut akornanni suliffeqarfiup pisariaqartitai soqutiginagit qaqugu sulissanerlutik imminnut naalagarisut amerlavallaarnerat nassuerutigisariaqalerparput, sulisitsisut kattuffiata Nusukap siulittaasua taama oqarpoq.
Suliffimminni aalajaatsuunnginnertik pissutigalugu soraarsitaasartut Lyngep amerlavallaarsorai. Soraarsitaasullu sulisitsisut pisuutittarpaat, soraarsitaanerminnut nammineq pisuussuteqarnertik eqqarsaatiginagu.