Suliniutit angisuut pillugit inatsit ukiortaami ilasseqatigiissitsinermi sammineqangaatsiarpoq
- Ukioq imaannaanngitsoq, Naalakkersuisut siulittaasuat oqalugiarnermini ilaatigut taama oqarpoq.
- Nassuerutigissavara, suliniutit angisuut pillugit inatsisiliornitsinnut atatillugu ilungersuumminartunik siooranartunillu tusagassiuutini allaaserisani nunaga Kalaallit Nunaat ilisariuminaatsikkakku. Erseqqissarlara, inatsit pineqartoq Kalaallit Nunaannut siunissamilu ineriartortitsinissatsinnut pingaaruteqarluinnarmat, oqalugiartarfimmit unnerpoq.
Aammattaaq danskit nunanut allanut ministeriata Villy Søvndalip oqalugiarnermini tusagassiuutit appisaluuppai. - Assersuutigalugu Kalaallit Nunaata Danmarkillu akornanni suleqatigiinnerup ilungersunartutut saqqummiunneqartarnera ilaatigooriarlunga tupaallaatigisarpara, oqalugiaammini oqarpoq. Villy Søvndalip siulittuutigaa Kalaallit Nunaanni aatsitassat 2013-imi tusagaqarfiginerumaarigut, aamma periarfissaq iluatsillugu naqissuseqqippaa, avatangiisit ataqqillugit ineriartorneq ingerlanneqartillugu Danmark tapersuissasoq. Inuit malunnaatillit arlallit ilasseqatigiissitsinermut ullumikkut ingerlanneqartumut peqataapput. Naalakkersuisunut ilaasortat arlallit, ilaatigut Jens B. Frederiksen, Ane Hansen, Maliina Abelsen, Ove Karl Berthelsen Anthon Frederiksenilu isaariami sanileriiaallutik qaaqqusanik tikilluaqqusipput, aammattaaq danskit ministerii arlallit ilasseqatigiissitsinermut peqataapput.