Sulinermut ilanngaateqartitsisalernissamik siunnersuut ilalerneqartoq

Akileraarusigassanik isertitallit sulinermut ilanngaammik pisalersinnaanissaat, Demokraatit sinnerlugit Inatsisartuni ilaasortap Andreas Uldumip siunnersuutigaa. Siunnersuut Inatsisartuni partiinit tamanit tapersersorneqarpoq, Andreas Uldumillu siunnersuutaa Naalakkersuisut paasilluaraat, Aningaasaqarnermut Naalakkersuisup Vittus Qujaukitsup oqaatigaa.

Andreas Uldum, Demokraatineersoq, ima oqarpoq:

- Imaakkami inuiaqatigiinni innuttaasut amerlasuut pisartagaqarnermiit sulinissamut nuukkaluaraangamik assigiinngissutaa malugerpiarneq ajoramikku. Taamaammat uani siunertaavoq sulerusulernissaq qaffassarniarlugu, taavalu aamma annikitsumik aningaasarsiallit annertunerulaamik pisartagaqalernissaat, Demokraatit sinnerlugit Inatsisartuni ilaasortaq Andreas Uldum oqarpoq.

Akileraarusigassanik isertitallit sulinermut ilanngaammik pisalersinnaassanngippata, sulinerup imminut akilersinnaannginnera attanneqassasoq, taassuma ilanngullugu oqaatigaa:

- Eqqaamassavarput Akileraartarnermut Atugarissaarnermullu Ataatsimiititaliarsuup isumaliutissiissummin una taakkartortupilussuuaa, aamma pingaaruteqartoq sulinermut ilanngaammik peqalernissaq aqqutissat ilagigaat. Taamaammat nuannaarutigaarput Inatsisartut tamarmiullutik tapersermassuk, kiisalu aamma Naalakkersuisut isumalluarnartumik oqariartuuteqarnerat, Andreas Uldum oqarpoq.

Naak sulinermut akileraartarnermi ilanngaat pillugu siunnersuut Aningaasaqarnermut Naalakkersuisup Vittus Qujaukitsup tapersersoraluaraa, imaaliallaannarlugu eqqunneqarsinnaanngitsoq oqaatigaa.

Akileraartarnikkummi aaqqissuusseqqittoqarnissaa eqqarsaatigalugu misissugassat amerlammata, sulinermi akileraartarnermi ilanngaat imaaliallaannarlugu eqqunneqarsinnaanngilaq:

- Sulinermut ilanngaat sulinitsinni nalilersugassat iliminiinnannguaraat, tassami akileraartarnikkut aaqqissuusseqqinnermi akileraarutit ataatsimut misissorneqartussaapput. Ilanngaateqartitsisarneq, aammalu akileraartarnermi akiliisitsiniartarneq ilaalu ilanngullugit tamakkorpassuit aappaagumut suliarisassanngorlugit siunniunneqarnikuupput, taamaattumik una sulinermut ilanngaat sulinermi qulaajaanermut sammisassat ilaminiinnannfuaraat, Aningaasaqarnermut Naalakkersuisoq Vittus Qujaukitsoq oqarpoq.

Sulinermi ilanngaat pillugu aalajangiiffigisassatut siunnersuut pilersaarutit malillugit maajip ulluisa 20-anni aappassaaneerneqassaaq.