Sulineq imminut akilersinnaasariaqarpoq
Ukiumut 1000 koruuninnguit. Tassa anaanap kisermaap ataatsimik meerallip suliffissaaleqiunnaarluni SIK-p isumaqatigiissutaani minnernik akissarsiaqarluni sulileruni tigusartagaasa ilassutisiassai.
Arnalli taassuma sulilerneratigut pisortat 220.000 koruunit iluanaarutigissavaat, pisortanit aningaasatigut ikiorsiissutit sipaarneqassammata aammalu sulilersoq akileraarutinik akilersuilissammat.
Taamaammat ikiuutinik pisartagaqaannarani sulilernissamut suut pilerinarsaataasinnaanersut politikerit isumaliutigilissuk. Akileraartarneq atugarissaarnerlu pillugit atatsimiititaliap siulittaasua, Torben Andersen, oqallissaarummik ullumi saqqummiussigami taama oqarpoq. Taanna Århusip universitetiani professoriuvoq, danskit aningaasaqarneq pillugu siunnersuisoqatigiivini siulittaasuusimalluni, aammalu atugarissaarneq pillugu danskit ataatsimiititaliarsuanni naammaassinnereersumi siulittaasuulluni.
- Isumaginninnikkut isumannaallisaaneq isumaviatut aaqqissuunneqarsinnaanerluni, tassalu inuit inooqataanermi isumannaatsumik atuagaqartillugit aammali sulinissamut pilerisutsillugit. Tassungalu atatillugu aamma inuit sulileqqinnissaannut ikorfartuisumik, tassami imaassinnaavoq inuit sulinnginnerannut aningaasatigut atukkat kisimik aporfiunngitsut, inuuniarnikkut atukkat allat aporfiullutik, Torben Andersen oqarpoq.
Tassalu inuit amerlanerusut sulilersinniarneranni isumaginninnikkut isumannaallisaanerup attatiinnarneqarnissaa ataatsimiititaliarsuup qitiulluinnartutut isigaa.
- Apeqqut akisassaq tassaavoq, qanoq ililluni isumaginninnikkut isumannaatsumik atugaqarluni sulileqqinnissaq anguneqarsinnaava? Tassami periarfissaqarpoq. Oqallisigineqarsinnaavormi, isumaginninnikkut isumannaallisaatit assigiinngitsut isertitaqalernikkut ilumut annaneqartassanersut.
Nunat allat, Kalaallit Nunaannisulli sulisoqarniarnikkut ajornartorsiuteqartut tamanna anigorsimavaat, assersuutigalugu sulileqqammertut akileraarutitigut millileriffigigallarneqarsinnaapput, professor Torben Andersen oqarpoq.
Nunatta ineriartornera ilorraap tungaanut ilumut sangutissagaanni meeqqat inuusuttullu aalluneqartariaqarput. Alliartornermi atukkat pitsaanerusariaqarput, aammalu imminut pilersulernissamut periarfissaqarluaqqullugit, Meeqqat Atuarfianni angusarissaarnissamut periarfissaqartariaqarpoq. Akileraartarneq atugarissaarnerlu pillugit ataatsimiititaliaq ilaatigut aamma taama oqallissaaarivoq.
