Sulilluartunut kuuloruujussaqartitsillutit sukangasumik sulisitsigit
Qaqortumi Niuernermik Ilinniarfiup pisortaa Torben Hansen oqarpoq ilinniartut ilaasa ilinniartuunersiutisisimagaangamik inortuikulasinnaasut atuariartunngitsoorsinnaasarlutilluunniit:
- Perorsaaneq meeqqallu atuarfiat matumani pingaaruteqarnerannik Halibut Greenlandip pisortaata Niels Thomasenip oqaaseqarnera tapersersorpara. Suliffigisamik ataqqinnillunilu pingaartitsisinnaaneq meeqqat atuarfianniilli ilikkarneqartariaqarsoraara. Tassa inortuisannginnissaq, suliamillu ataqqinninnissaq, Torben Hansen, Qaqortumi Niuernermik Ilinniarfimmi pisortaq oqarpoq, angajoqqaallu matumani aamma akisussaaffeqarnerat naqissuserlugu.
- Pingaartumik isumalimmik suliaqarnissaq pingaaruteqarpoq, sulerusussusermut tamanna pingaaruteqaqimmat, Torben Hansen aamma oqarpoq, ilinniartitaanerlu pissanganartoq matumani aamma pingaartuutinnerarlugu.
Sulisut assersuutigalugu aasanerani sulinngiffeqarnerup nalaani ikiligaangata, sulisut ilaasa akissarsisimatillutik inortuisalersarnerat sulinngitsoortarnerallunniit ajornartorsiutaasinnaasartoq, Royal Greenlandip paasissutissiinermut ingerlatsisuata Kate Hansenip aamma oqaatigaa, taamaalisoqartilluguli suliffeqarfik sulisunut neqerooruteqartarpoq:
- Assigiinngitsutigut iliuuseqarfiginiartarpavut. Sumiiffiit ataasiakkaat eqqarsaatigissagaanni tunisassiorfinni ingerlatsisut oqaloqatiginninnissamik sulisunut neqerooruteqartarput, kisianni sulisut sulinngitsuukulappata imaluunniit inortuikulappata tunisassiorfinni ingerlatsisut sulisuminnik mianersoqqussutinik tunisisinnaasariaqalersarput, Royal Greenlandip paasissutissiinermik ingerlatsisua Kate Hansen oqarpoq.
Royal Greenlandip tunisassiorfiini sulisut 500-t missaat ukioq manna suliassakinnerup nalaani pikkorissartinneqarput, ilaqutaat aamma peqataatinneqarlutik. Tassa inooqataat, aappaat meeraallu pikkorissaanermi peqataatinneqarsimalllutik.
Sanaartornermik Ilinniarfiup pisortaa Jokum Møller aamma oqarpoq ilinniartut ilaat ilinniartuunersiutisisimagaangamik atuanngitsoorunilluunniit inortuikulasinnaasartut. Ajornartorsiullu aaqqiiviginiarlugu ilinniartoq oqaloqatigineqartartoq, Jokum Møllerip oqaatigaa.
