Suliffissuarmi sulisussaaleqisoqareeraluartoq sulisussarsiortoqanngilaq
Qasigiannguani sulisussaaleqineq pissutaalluni Royal Greenland ilaatigut amigartooruteqartoq qaammatip ataatsip missaa qaanngiuttoq suliffeqarfissuup pisortaata Flemming Knudsenip utoqqatsissutigaa. Taamaakkaluartoq Qasigiannguani suliffiit inuttassarsiorneqarnerat pillugu nivinngakkatigut suli nassaassaqanngivippoq. Tamanna suliffissuup tassanngaannartumik sulisussaaleqiunnaarneranik pissuteqanngilaq.
-Suliffissarsiuussisarfiit aqqutigiinnarlugit suliffissarsiortut attavigisinnaasarpavut. Imaanngilaq inuit suliffeqareersut aammalu suliffigilerumalluta periarfissanik misissuisut attaveqarfigisarivut, tamannalumi imaassinnaavoq iliuuseqarfigivallaarsimanngisarput, Flemming Knudsen oqarpoq.
Inunnut suliffissarsiuussisarfiliarneq ajortunut takuneqarsinnaasumik Royal Greenlandip iliuuseqannginnera naammaginartuunersoq aperineqarami pisortaq ima akivoq:
- Tamanna soorunami apeqqutigineqarsinnaavoq, kisianni inuit sulerinersugut sunillu neqerooruteqarsinnaasugut soqutigigunikku namminneq suliniuteqarnermikkut takussusersinnaalluaraat isumaqarpunga.
Taamaalilluni suliffissuaq sulisussaaleqigaluarluni sulisussarsiunngilaq, suliffissarsiuussisarfiillu isumalluutigalugit tamannalumi aamma tutsuiginartortaqarpoq. Nuttartitsinermut aaqqissuussineq, Ilaqutariinnit naalakkersuisunut qinnuteqartarfik, aqqutigalugu Royal Greenland Qasigiannguani inunnik 15-inik sulisussanik ukiuni kingullerni atorfinitsitsivoq, taakkunanngalu qulit suli sulisorineqarput.
Taamaalilluni taanna iluatsissimavoq Flemming Knudsen oqarpoq.
Namminersorlutik Oqartussat, kommuni, SIK aamma Royal Greenland sulisussarsiortarneq pillugu Qasigiannguani ullumi ataatsimiipput.
Nuttartitsinermik aaqqissuussinerup ataani sulisussarsiortarnerup atugaasimasup sunniutigisimasai aamma patajaallisaaniaraanni suut pisariaqartinneqarnersut oqaluuserigaanni, taava imaassinnaavoq takussutissaqartumik sulisussarsiortalernermik tamanna kinguneqartoq, suliffeqarfissuup pisortaa Flemming Knudsen oqarpoq.