Suliffissarsiortutut nalunaarsorneqarsimasut suli ikiliartortut
Tassami siorna 2015-imi apriilimi suliffissarsiortutut nalunaarsorneqarsimasut katillutik 3.961-upput, ukioq mannalu katillutik 3.241-llutik.
Nunatsinni piffissap taamaalinerani suliffissarsiortutut nalunaarsorneqarsimasut taamaalillutik 720-nik ikileriarsimapput.
Nuummi, Sisimiuni Ilulissanilu suliffissarsiortut ikileriarnerpaasimapput, Tasiilamili 72-inik amerleriarsimallutik.
Suliffissarsiortutut ukioq manna apriilimi nalunaarsorneqarsimasunit 3.241-sunit 460-it nunaqarfinneersuupput.
Taakkualu siorna piffissap taamaalineranut naleqqiullugu aamma ikileriarsimapput, katillugit 137-nik ikinnerulerlutik.
Nunaqarfinni illoqarfinnilu angutit 20-niit 24-nut ukiullit suliffissarsiortut amerlanerpaasut arnanilu suliffissarsiortut amerlanersaat 20-t 29-llu akornanni ukioqartuullutik, Naatsorsueqqissaartarfiup kisitsisaataasa takutippaa.
