Suliffissaaleqisut ikilisut
Kommunit, aamma Namminersorlutik Oqartussat aallartisagaannut suliffissaaleqisunut immikkut ittumik iliuuseqarnermut suliffissaaleqisut ikileriarnerat isigineqassaaq, Inuussutissarsiornermut Suliffeqarnermullu Naalakkersuisoq, Ove Karl Berthelsen, oqarpoq.
Iliuuserisaq annertoorsuusoq Piareersarfiit, suliffissarsiuussisarfiit aamma sulianik ilinniarfiit akuuffigisaat, suliffissaaleqinerup akiorniarneranut ilaatitaq, aggustip qaammataani aallartinneqarpoq.
2012-ip qaangiutinnginnerani inuit 1.440-t ilitsersorneqarnermik, piginnaanngorsagaanermik, sammisanik pikkorissarnermik, imaluunniit ilinniagaqarnermik aallartitaqarsimanissaat, tamaasa isigalugit naatsorsuutigineqarpoq.
Suliffissaaleqisunut iliuutsip ilarujussua tassaavoq suliffeqarfiup inissaqartitsisup eqqunniarnera, tassani piginnaanngorsaaqqinneq ikiorsiullugu suliffissaaleqisut atorfimmi suliaqarsinnaanissaanut sungiusarnissamik ilinniartitaaqqinnissamillu pisariaqartitsisut ilanngussorneqarlutik. Suliffissaaleqisunut sammisanik pikkorissartitsinerit, pingaartumik inuussutissarsiorfinnut siuarsakkanut nutaanut, soorlu aatsitassarsiorfiusumut takornariaqarfiusunullu tunngatinneqarput.
Inuusuttunut, meeqqat atuarfiata kingornatigut ilinniagaqarnermik aallartitaqarsimanngitsunut, tunngatitanik pilersitsiniarnerit nutaatut aallartisarneqarput.
Suliffissaaleqisut pillugit kisitsisit nutaat Ove Karl Berthelsenip nuannaarutigai.
- Aqqut eqqortoq atugarilerlutigu maannakkut ineriartornerup ingerlasup takussutissiivigaatigut, tusagassiuutinut nalunaarummi allappoq.