Suliffissaaleqisut 2010-mi amerleriarput
Naatsorsoqqissaakkat marloqiusanngorlugit naatsorsorneqarput. Qaammatip qeqqata nalaani suliffeqanngitsut kiisalu suliffeerunnermik eqqugaasut, qanorlu paasisariaqarnersut paasissutissat ataanni nassuiarneqarpoq.
Kisitsisit malillugit qaammatip qeqqata nalaani suliffeqanngitsut, tassa inuit qaammatip aallartinnerani naaneranilu suliffissaaleqisut, Sisimiuni amerleriarnerpaasimapput, agguaqatigiisillugu qaammammut inuit suliffissaaleqisut 33-nik amerleriarsimallutik.
Suliffeerunnermik eqqugaasut Nuummi amerleriarnerpaasimapput, agguaqatigiisillugu qaammammut inuit suliffeeruttut 141-nik amerleriarsimallutik. Ataatsimulli isigalugu Nuummi suliffeqanngitsut ikinnerpaajupput.
Sisimiut eqqaassanngikkaanni illoqarfinni tamani angutit suliffissaaleqisut arnanit suliffissaleqisunit amerlanerupput. Sisimiuni kisimi arnat suliffissaleqisut angutinit suliffissaaleqisunit amerlanerupput.
Angutit suliffissaaleqisut amerlanerussuteqarnerat, angutit suliffigisartagaasa nikerartarneranik ilaatigut peqquteqarpoq. Assersuutigalugu sanaartornerup iluani suliffeqarnerup nikerartuunera.
Illuatungaatigulli suliffeqalernissamut piareersimanngitsut akornanni arnat amerlanerussuteqarput. Tamanna ilaatigut erninermi sulinngiffeqarnermik angerlarsimaannartuunermilluunniit peqquteqarpoq. Taakkulu naatsorsoqqissaakkami peqataanngitsut, Kalaallit Nunaanni naatsorsueqqissaartarfiup nalunaarutigaa.
Saaqummiussaq qallunaatuinnaq saqqummiunneqarsimavoq.
Paasissutissat:
- Qaammatip qeqqani suliffeqanngitsut tassaanerarneqarput inuit qaammatip ataatsip aallartinnerani naaneranilu suliffeqanngitsutut nalunaarsornikut.
- Suliffeerunnermik eqqugaasut tassaanerarneqarput inuit qaammatip ataatsip ingerlanerani suliffissarsiuussisarfimmut suliffissarsiortutut saaffiginnissimasut, sivitsunngitsorli suliffissarsiuussisarfimmit innersuussamik suliffittaartut, namminerluunniit suliffissarsisut.
Naatsorsueqqissaartarfiup saqqummiussaat pillugu uani takusaqarsinnaavutit: