ASSIT Suliffimmi eqaarsaarneq nuannaarnerulersitsisoq
Royal Greenlandip tunisassiorfiisa ilaanni sulinerup nalaani sulisut eqaarsaaqatigiittarnerat, sulisunik qiimanerulersitsisoq, atorluarneqartoq, Royal Greenlandip nittartakkamini allaaseraa.
Kangaatsiami Royal Greenlandip tunisassiorfiani sulisut ullut tamaasa nalunaaqutaq qulinut tasisuaartoq atorlugu eqaarsaaqatigiittarput.
Tunisassiorfimmi sulisut timertik atorlugit sulisarput oqimaatsulerisarlutillu. Taamatut sulinermi timip aalatinnera assigiiaaginnalersinnaasarpoq, taamaammallu timip allatulaaq aalatinnissaa pisariaqarsinnaalluni.
Tunisassiorfimmi eqaarsaaqatigiinneq sulisunut peqqinnaannarani aamma nuannaarnerulersitsisimasoq Kangaatsiami Royal Greenlandip tunisassiorfiani sulisut sinniisuat tunisassiorfimmilu ataqatigiissaarisoq Aqqalu Martin Lynge oqaluttuarpoq.
- Ataatsimoorluta eqaarsaaqatigiittarnerput suleqatikkalu nuannarisorujussuuarput, ataatsimoornermik aamma sulinermi nuannaarnerulernermik pilersitsisoq suleqatima uangalumi misigaarput.
- Aamma ullormut akunnerpassuit sulinitsinni ilaatigullu oqimaatsunik kivitsisarluta sulisaratta timitta aalatinnerulernera iluaqutigaarput, Aqqalu Martin Lynge tunisassiorfimmi eqaarsaaqatigiittarnerni aamma ilitsersuisuusartoq Royal Greenlandip nittartagaanut oqarpoq.
Eqaannerulerneq, ataatsimoornerulerneq nuannaarnerulernerlu
Aqqaluk Martin Lyngep, ilitsersuummik malitaqarluni eqaarsaartitsisartup, oqaatigaa eqaarsartarnermi timi tamaat kingusinnerusukkut atorneruleriartussallugu.
- Naak tasitsaarluta eqaarsaaqatigiittarnerput minutsit tallimat qulillu akornanni sivisussuseqaannartaraluartoq timinnut sunniuteqartoq malugisinnaavara. Nuannaarnerulerpunga aamma timera eqaannerulerpoq.
- Taamaattumik tunisassiorfiit allat aamma suliffeqarfiit allat sulinerup nalaani eqaarsaartarneq atuutilersissagaat innersuussutigisinnaavara, eqaarsaartarnermi timimut peqqinnerulersitsiinnarani sulinermik nuannaalersitsillunilu ataatsimoornermik misigilersitsimmat, Aqqaluk Martin Lynge oqarpoq.