Suliffeqarfiit oqaatsit pillugit politikkeqassapput
Siumut partiinit kisiartaalluni siunnersuummut akerliugaluarpoq siunnersuut pikassataanerarlugu amigaateqarnerarlugulu. Siumup ilaatigut inatsimmut aningaasaliussat 2,2 mio. koruuniusut naammagittaalliuutigai. Aningaasat taakkua aamma atortussat kalaallisut atuartitsinermi atorneqartussat suliarineqarnissaannut atorneqassapput, tamannalu Siumumeersumit Aleqa Hammondimit aappassaattut siunnersuutaalluni. Taamaattumik aningaasat Siumup naammassangatinngilai.
Inatsimmi piumasarineqarpoq suliffeqarfiit pisortanit pigineqartut, oqartussaaffeqarfiit kiisalu suliffeqarfiit namminersortut qulinik taakkualuunniit sinnerlugit sulisoqartut oqaatsinut politikkissaminnik ilusilersuissasut aammalu sulisut oqaatsinik atuartitsinissamik pisariaqartitsisut ataasiakkaarlugit oqaloqatigissagaat. Aammattaaq kalaallisut kalaallillu kulturiannik atuartitsisussat atuartinnissaat sulisitsisut akisussaaffigaat.
Atuartitsinermut atortut nutaat saniatigut aamma kalaallit qallunaallu oqaasiinik pikkorissartitsinerit, tuluttut oqaatsinik ilinniarfinniinnissat kiisalu oqalutsit bacheloritut ilinniarnermut assingusumik ilinniartitaanissaat pilersinneqassapput.
Ataatsimiititaliami amerlanerussuteqartunit akuersissutigineqannginnermini inatsit immikkorluinnaq aappassaaneerlugu oqaluuserineqarpoq. Suliffeqarfiit inatsimmik maleruaanngippata qanoq amerlatigisunik akiliisinneqartarnissaasa erseqqissuunnginnerat ataatsimiititaliap ilaatigut isornartorsiorpaa.
Tamatuma saniatigut ataatsimiititaliap aamma kalaallisut allagartalersuisarnermut aalajangersakkat aammalu suliffeqarfiit innuttaasunit allakkatigut saaffiginnissutinik qanoq oqaasertaliusarnissaat pillugit malittarisassiat maqaasivai.
Naggataatigut oqaaseqaatimini ataatsimiititaliap erseqqissarpaa inatsit killiliussatut inatsisaammat, allannguutinik aalajangersakkanilluunniit nutaanik malitseqartinneqartussaq.
Inatsit juulip aallaqqaataani atuutilissaaq, suliffeqarfiilli oktobarip aallaqqaataata tungaanut aalajangersakkanik nutaanik naammassinninniartussaallutik.
