Suliffeqarfiit marluk Nuummi atuarfissualiornissamut neqerooruteqarput

Nuummi atuarfimmut nutaamut, meeqqerivimmullu meeraaqqeriviutigisumut suliariumannittussarsiuussineq naammassineqaqqammerpoq, suliffeqarfiillu marluk neqerooruteqarsimapput. Atuarfik Kalaallit Nunaanni aatsaat taama angitigissaaq, 1200-nik atuartoqarsinnaassalluni.

Allattoq Jens Betak

oktobarip 02-at 2019 05:37

Nutserisoq Mads Lynge

Nuuk City Development suliariumattussarsiortitsisuuvoq, sanaartugassanillu suliassinneqartartoq Danmarkimeersoq MT Højgaard, suliffeqarfiillu Islandimeersoq Ístak neqerooruteqartuupput.

Neqeroorutit sapaatip-akunnerini tulliuttuni maanna taava atuarluarneqassapput, neqerooruteqartullu isumaqatigiinniarnikkut neqeroorutiminnik iluarsiissuteqarnissaminnik periarfissinneqassallutik.

Nalilersuisartutut ataatsimiititaliap isumaqatiginninniarnerup inernera pilersaarutillu qaammatini tulliuttuni misissuataassavaat. Nalilersuisartut tassaapput politikerit, sanaartortitsisunut siunnersortit, Nuuk City Development kiisalu suliaqartut allat.

AAMMA ATUARUK To selskaber i spil til byggeri af ny storskole i Nuuk

Nuuk City Development neqerooruteqartut marluk akornanni kingorna taava aalajangiissaaq sanaartugassanik suliassinneqartartoq sorleq toqqarneqarsimanersoq.

Atuarfiup nutaap atuarfiit Ukaliusaq Atuarfik Samule Kleinschmidtilu taarsissavai, 1200-nillu atuartoqassalluni. Sunngiffimmi ornittagaq atuarfiup ilaani aamma inissinneqartussaq 400-nik inissaqarsinnaassaaq, soorlu aamma meeqqerivimmit, meeraaqqeriviutigisumik inissaqassasoq. Atuarfittaassaq Blok P-iip illoqarfiup qiterpasissuani toqqavigisimasaani sananeqassaaq.

Atuarfittaassamik sanaartornerup aappaagu 2020-mi qaammatit siulliit arfinillit ingerlaneranni aallartinneqarsinnaanissaa naatsorsuutigineqarpoq, sanaatornerullu 700 millionit koruunit missaannik akeqarnissaa ilimagineqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.