Suliffeqarfiit isumaginninnikkut akisussaaffiat isumasioqatigiissutigaat

Tassani oqaluuserisassat pingaarnersarissavaat, Nunatsinni suliffeqarfiit ingerlatsineranni inuiaqatigiit akisussaaqataatinneqarnerannik misilittagaat.

- Isumasioqatigiisitsinermi malunnartinniarneqartussanut ilaassaaq, CSR Greenlandip ukiuni marlunni atuunnerani, Nunatsinni nunanilu allani malunnaateqarluartumik iluatsittumillu maluginiarneqarsimanera. Tusagassiutinut nalunaarummi ilaatigut taama allassimavoq.

Isumasioqatigiinnermi saqqummiussisoqarluni oqalugiartoqassaaq eqimattakkaarlunilu eqqartueqatigiittoqassalluni.

Saqqummiussisussat ilagaat, Copenhagen Business School-imeersoq professori, Andreas Rasche, Price Waterhouse Coopersimi piginneqataasoq, Birgitte Mogensen aamma Transparency Greenlandimi siulittaasoq, Anders Meilvang.

Isumasioqatigiinnermi peqataasussat ilagaat, Kalaallit Nunaanni Sulisitsisut peqatigiiffiat, Royal Arctic Line, GrønlandsBanken, Kalaallit Brugseniat, TELE Greenland, Air Greenland, Royal Greenland, Changeagents, LaCour Dania aamma CSR Greenland.

- Isumasioqatigiinnermi saaffigineqarput suliffeqarfiit, kajumissutsiminnik suliniaqatigiiffiit pisortallu oqartussasui, CSR tunngavigalugu sulinikkut qanoq pitsaanerusumik angusaqartoqarsinnaaneranik ilisimasaqarnerusutut, CSR Greenlandimeersoq Anita Hoffer oqarpoq.

Taassuma ilanngullugu oqaatigaa, isumasioqatigiinneq oqaluuserineqartussat Nunatsinni suliffeqarfinnut pingaaruteqartuussasut.