Suliffeqarfiit inuiaqatigiinni iluaqutaanerujumapput

Suliffeqarfiit Nunatsinni attaveqarfiat, CSR Greenland, alliartorluarpoq. CSR Corporate Social Responsibility-imit naalisaataavoq - isumaqarluni nunani tamalaani suliffeqarfiit inuiaqatigiinnut akisussaaffiat.

2009-mi ukiakkut aallartikkami tallimaannarnik ilaasortaqarpoq, taakku tassaallutik Air Greenland, Royal Arctic Line, Grønlandsbanken, Sulisitsisut Peqatigiiffiat aamma Kompetencekompagniet, maannali suliffeqarfiit peqatigiiffiillu 30-t sinnerlugit ilaasortaapput.

Royal Greenland, Nuna Minerals, Nuup Bussii aamma Ittu.net-ilu CSR-imut maanna ilaasortanngorsimapput, ilaasortallu pikkorissarnertigut ataatsimeersuarnertigullu ilisimasaminnik paarlaateqatigiittarput, soorlu Future Greenland ukioq-manna siusinnerusukkut taamaaliorsimasoq. "Suliffeqarfik Peqqissoq" CSR-ip aallartissimavaa, Nuummilu upernarnerani saliineq sapaatip-akunneri arlallit matuma siorna aamma aallartissimallugu.

Royal Greenlandip CSR-imut ilaasortanngorneranut Royal Greenlandimi pisortaanerup, Mikael Thinghuusip, tunngavilersuutigaa, suliffissaqartitsinissaq aningaasarsiorluarnissarlu inuussutissarsiornerup inuiaqatigiinnut tunniussassaasa pingaarnersarimmagu. Inuiaqatigiinnulli avatangiisinullu naleqqussaanikkut tamatuma pinissaa erseqqissaatigaa.