Suliffeqarfiit Cairnimut kiffartuussisut ataatsimeeqatigineqarput

Pilersuinissamik ataatsimiititsineq Cairn Energyp Namminersorlutik Oqartussat kommuunillu akornanni isumaqatigiissuteqarnerisigut piumasaqataavoq, tassani qulakkeerneqarluni, suliffeqarfiit kalaallinit pigineqartut  Cairn Energymik kiffartuussillutillu sullississasut.

- Suliffeqarfinnut kiffartuussinissamik isumaqatigiissuteqarfigineqartunut piumasaqaatit annertupput, aamma illuatungaani isumaqatigiissuteqarneq ingerlaannaq atorunnaarsinneqarsinnaavoq, Jens Christiansen Aasianni assartuussinermik suliaqartoq oqarpoq.

Atortut uuliasiortitsiviup pisariaqartitai, Jens Christiansenip pisiarai, naak Cairn Energy nunatta imartaani aappaagu uuliamik ujaasilluni qillleriniarnerminik suli nalunaaruteqanngitsoq.

- Taamak annertutigusumik isumalluartoqartariaqanngilaq, Jens Christianse oqarpoq, imaassinnaavoq Cairn Energy nunatsinnut tikiinnarluni uuliamik ujaasinaniluunniit aallartoq.

Aappaagumut isumalluarpit?

- Isumaqarpunga tikeqqissasut, tikeqqinnissaannut suna tamaat piareersimatipparput. Aasiannut Sisimiunulluunniit tikissanersut aamma ilisimanngilarput, Jens Christiansen oqarpoq.
 
Aasiaat Transport Cairn Energymut siorna sullissivoq misilittakkallu ajunngilluinnartut, Jens Christiansen oqaluttuarpoq.

- Aallaqqaammut annikuitsuinarnik sullippagut, naggataatigullu sullissinerput annertuserujussuarpoq,  qillerutit ruujorertaannnik assartuineq, eqqakkat cointainerillu eqqaavittut atorneqartut assartorpagut, ukiormannalu sullissinigut ilaqqinneqarput, Jens Christiansen Aasiaat Transportimeersoq, Cairn Energymik kiffartuussisarnini pillugu oqarpoq.

Ataatsimiinnermi Cairn Energyp sinniisuutitaasa, sulinertik minnnerunngitsumillu suliffeqarfinnut pilersuisunut piumasaqaatitik erseqqissarlugit saqqummiuppaat. Piumasaqaatit amerlapput. Avatangiisinut, peqqinnissamut, isumannaallisaanermut aamma tuluit oqaasiinik pisinnaasaqarnissamik piumasaqaatit saqqummiunneqarput.

Cairn Energyp taassumalu pilersuisui, Namminersorlutik Oqartussat kommuunillu isumaqatigiissuteqarnerat malillugu, pisiassanik sullinneqarnermillu 311 millionit koruuninik naleqartunik pisiaqarsimapput, tamannalu siorna qillerisoqarneranut naleqqiukkaanni marloriaatingajaavoq.

Kalalallit Cairn Energymik sullissisut aappaagu suliakkerneqassanersut ukiup naalernerani aalajangiiffigineqassaaq,  maannamut qillerinerit iluatsitsiffiunngikkaluartut aappaagu 2012-imi nunatta imartaani uuliamik ujaasillutik qilleriniarnerlutik aalajangerunik.