Suliffeqanngitsut ukiuni arlalinni ikiliartoreerlutik amerlisut
Suliffeqanngitsut ukiuni sisamani appariartoriarlutik siornaak amerlipput.
Nunatsinni Naatsorsueqqissaarfiup 2020-mi suliffeqanngitsunik naatsorsuinerata nutaap tamanna takutippaa.
Suliffeqanngitsut qaammatit tamaasa agguaqatigiissillugit 1.431-upput. Tassa sulisinnaasut 5,3 procentii.
Suliffeqanngitsut 2019-imi qaammatit tamaasa agguaqatigiissillugit 1.387-iupput.
- Qaammatikkaartumik suliffissaaleqineq 2019-imut naleqqiullugu inunnik 44-nik 3,2 pct.-imik annertutigaluni qaffariarsimavoq, Naatsorsueqqissaartarfik allappoq.
Tasiilami inuit tallimaagaangata ataaseq suliffeqanngitsuusartoq
Naatsorsuineq misissorluaraanni nunap immikkoortuini suliffeqanngitsut procentinngorlugit amerlassusaat nikingasorujussuupput.
Sulisinnaasut ima nassuiaaserneqarput
- Sulisinnaasut ima nassuaatigineqarput, suliffeqarsinnaasut najugaqavissut 18-init 65-inut ukiullit (2020) suliffeqartut imaluunniit suliffeqanngitsut.
- Sulisitsinnaasut 2020-mi qaammammut agguaqatigiissillugit 26.978-ipput, taakkunannga 25.547-t suliffeqarput, 1.431-llu suliffeqanngitsutut nalunaarsorsimallutik.
- Sulisinnaasut najugaqavissut suliffeqarsinnaasutut ukioqartut 36.763-iupput, taakkunannga 9.785-it tassa sisamararterutaat innuttaasunit najugaqavissunit sulisinnaasunit 18-init 65-inut ukiullit avataanniipput.
Uummanna suliffeqanngitsut ikinnerpaapput. Sulisinnaasut agguaqatigiissillugit 1,8 procentii kisimik tassani suliffeqanngitsutut qaammatit tamaasa nalunaarsorsimasarput.
Tasiilamili suliffeqanngitsut nalunaarsornerat allarluinnaavoq. Tasiilap immikkoortuani suliffeqanngitsut qaammatikkaartumik nalunaarsorsimasut amerlanerungaatsiarput.
Sulisinnaasut agguaqatigiissillugit 21,8 procentii 2020-mi suliffeqanngitsutut nalunaarsorsimapput. Tassa imaappoq sulisinnaasut tallimaangaata ataaseq suliffeqanngitsuusarpoq.
Illoqarfiit pingaarnersaanni sulisinnaasut 3,1 procentii suliffeqanngitsutut nalunaarsorsimapput, tamannalu nunatsinni agguaqatigiissillugu kisitsimmit 5,3 procentimit appasinneruvoq.
Nunaqarfinni suliffeqanngitsut arlaqarut
Illoqarfinni annerusuni suliffeqanngitsut amerlanerunerat tupaallannartuunngilaq, taakkuli sulisinnaasut amerlassusaannit suliffeqanngitsunut sanilliukkaanni suliffeqanngitsut nunaqarfinniittut amerlanerpaapput.
- 2020-mi nunaqarfinni sulisinnaasut akornanni agguaqatigiissillugu 8,5 pct.-ii qaammatit tamaasa suliffissaaleqinermik eqqugaasarsimapput, illoqarfinni sulisinnaasut akornanni 4,9 pct.-ii suliffissaaleqisutut nalunaarsorsimasut, misissueqqissaarnermi allassimavoq.
Nalunaarsuineruttaaq angut arnanit suliffissaaleqinerusartut aamma takutippaa.
Kangaatsiaq sulisinnaasut akornanni suliffissaaleqineq procentinngorlugu 12 pct-imiippoq.
Nunap immikkoortuani sulinngifeqanngitsut ikinnerpaat amerlanerpaallu aaku
- Uummannami suliffissaaleqinerup procentinngornera 1,8 pct.-imiippoq.
- Upernavimmi suliffissaaleqinerup procentinngornera 2,5 pct.-imiippoq.
- Qasigiannguani suliffissaaleqinerup procentinngornera 2,9 pct.- imiippoq.
---------------------------------------------------------------------------------------------
- Tasiilami sulisinnaasut akornanni suliffissaaleqineq procentinngorlugu 21,8 pct-imiippoq.
- Nanortalimmi sulisinnaasut akornanni suliffissaaleqineq procentinngorlugu 14,9 pct-imiippoq.
Sulisinnaasunit suliffeqanngitsut qaammatikkaartumik agguaqatigiissillugit 5,4 procentii angutaapput, arnallu sulisinnaasut 5,2 procenteralugit.
Ilinniarsimanngitsut suliffeqannginnerusut
Ingerlariaqqiffiusumik ilinniagaqanngitsut suliffeqanngitsut akornanni takussaanerupput.
- Suliffissaaleqisut 82 pct.-ii, meeqqat atuarfiannit qaffasinnerusumik ilinniagaqarsimanngillat, naatsorsuinermi allassimavoq.
Qaffasissumillu ilinniagaqarsimasuni suliffeqanngitsut sulisinnaasut 0,5 procentiinnaraat.
Tamatuma saniatigut inuusuttut 30-t ataallugit ukiullit akornanni suliffeqanngitsut amerlanerpaapput.
