Meeqqat inuusuttullu: Suliassaqarfik aningaasalerneqangaatsiarsimasoq isornartorsiorneqartoq
Isumaginninnermut Naalakkersuisoqarfiup nakkutilliisuutitaasa nalunaarusiaat nutaaq Kommuneqarfik Sermersuup meeqqanut suliassaqarfianik isornartorsiuingaatsiarpoq.
Illoqarfiit pingaarnersaanni suliaqarneq pingaartumik nalunaarusiami isornartorsiorneqarpoq suliassaqarfimmilu ingerlatsineq illersorneqarsinnaanngitsuunerarlugu.
AAMMA ATUARUK Sermersuumi meeqqat pisortanit sumiginnagaapput
Naak ukiuni kingullerni tallimani suliassaqarfimmut aningaasat amerlanerujussuit atorneqaraluartut isornartorsiorneqarpoq.
Kommuneqarfik Sermersuup meeqqanut inuusuttunullu aningaasat 118 millionit koruuningajaat 2011-imi ikiorsiiniutigisimagaluaraat. Aningaasat taakku 2016-imi 210 millionit koruuningajanngortinneqarput.
AAMMA ATUARUK Sermersuup politiinik suleqateqarnera illersorneqarsinnaanngilaq
Illoqarfiilli pingaarnersaata kommuniani meeqqanut inuusuttunullu suliassaqarfimmi ajornartorsiutit amerlallutillu annertupput, tamannalu Kommuneqarfik Sermersuumi Meeqqanut Ilaqutariinnullu ataatsimiititaliap siulittaasuata uggoraa:
- Kommunalbestyrelsemiinninni meeqqanut inuusuttunullu sumiginnagaasunut aningaasartuutigut marloriaatingajanngortippagut. Aningaasaliissutissanik ataasinnguamik qujaannarnikuunngilagut, suliniutigineqaqqittut amerlanerusut suliarisimavagut. Suliniutilli taakku iluatsissimanngitsut maanna takutinneqarpoq. Tamanna pakatsissutigaara kamaammissutigalugulu, ataatsimiititaliami siulittaasoq, Uju Petersen Sermitsiaq.AG-mut oqarpoq.
